पुण्यात खाकी मलीन! 'कोम्बिंग ऑपरेशन'चे खोटे कारण सांगून पबमध्ये रंगेलपणा करणाऱ्या पोलिसाला पत्नीने रंगेहाथ पकडले; हवालदार निलंबित

पुणे: "आज ड्युटीवर कोम्बिंग ऑपरेशन आहे," असे सांगून घराबाहेर पडलेल्या एका पोलीस हवालदाराचा प्रताप त्याच्या पत्नीनेच उघडकीस आणला आहे. पत्नीला कामाचे खोटे कारण देऊन पबमध्ये दुसऱ्या महिलेसोबत पार्टी करणाऱ्या या हवालदाराला रंगेहाथ पकडल्यानंतर, पोलीस प्रशासनाने त्याच्यावर निलंबनाची कठोर कारवाई केली आहे.

हनुमंत गुलाब कांबळे (रा. वडकी) असे निलंबित करण्यात आलेल्या हवालदाराचे नाव असून ते काळेपडळ पोलीस ठाण्यात कार्यरत आहेत. मिळालेल्या माहितीनुसार, कांबळे यांनी आपल्या पत्नीला "कोम्बिंग ऑपरेशन सुरू आहे" अशी खोटी माहिती दिली आणि ते एका महिलेसोबत पबमध्ये गेले. मात्र, पतीच्या वर्तणुकीवर संशय आल्याने पत्नीने त्यांचा पाठलाग केला. पुण्यातील एका पबमध्ये हनुमंत कांबळे हे दुसऱ्या महिलेसोबत मज्जा-मस्ती करताना पत्नीला आढळले. यावेळी पबमध्ये मोठा गोंधळही उडाला.

केवळ फसवणूकच नाही, तर कांबळे हे आपल्या पत्नीचा शारीरिक आणि मानसिक छळ करत असल्याचेही समोर आले आहे. पत्नीने जाब विचारल्यास ते पोलीस असल्याचा धाक दाखवत, शिवीगाळ करत आणि घटस्फोटाची धमकी देत असत. याप्रकरणी पीडित पत्नीने काळेपडळ पोलीस ठाण्यात तक्रार दाखल केली आहे.

पोलीस उपायुक्त डॉ. सागर काकडे यांनी या घटनेची गंभीर दखल घेतली आहे. कर्तव्यावर असताना किंवा खाकी वर्दीचा आदर न राखता अशा प्रकारचे अनैतिक कृत्य केल्यामुळे पोलीस दलाची प्रतिमा मलीन झाली आहे, असा ठपका ठेवत त्यांनी हनुमंत कांबळे यांना तात्काळ निलंबित करण्याचे आदेश दिले. या घटनेमुळे पुणे पोलीस दलात मोठी खळबळ उडाली आहे.