वय ७४ वर्षे आणि ७२ देशांची एकट्याने सफर! ब्रिटनच्या 'गिल आजीं'चा जगप्रवासाचा प्रेरणादायी थरार

लंडन/बीजिंग: जिद्द आणि उत्साहाच्या जोरावर वयाचे कोणतेही बंधन झुगारून देता येते, हे एका ७४ वर्षीय ब्रिटिश महिलेने सिद्ध करून दाखवले आहे. या धाडसी आजींचे नाव आहे 'गिल'. वयाच्या ७४ व्या वर्षी त्यांनी जगातील तब्बल ७२ देशांची एकट्याने सफर पूर्ण केली असून, सध्या त्यांचा चीनमधील प्रवास सोशल मीडियावर प्रचंड व्हायरल होत आहे. नेहमीच्या पर्यटकांसारखे केवळ फिरणे हा गिल आजींचा उद्देश नसून, ज्या देशात त्या जातात तिथे त्या स्वयंसेवक म्हणूनही काम करतात. अलीकडेच त्या चीनमध्ये पोहोचल्या असता, स्थानिक लोकांनी त्यांचे केलेले स्वागत पाहून त्या भारावून गेल्या. नैऋत्य चीनमधील एका विद्यार्थ्याशी झालेल्या भेटीमुळे त्यांच्या या साहसाची गोष्ट जगासमोर आली.

प्रवासादरम्यान त्या स्थानिक संस्कृती, खाद्यपदार्थ आणि लोकांमध्ये मिसळून राहण्याला प्राधान्य देतात.आश्चर्याची गोष्ट म्हणजे, आजच्या तरुण पिढीप्रमाणे त्यांना मोबाईल अ‍ॅप्स किंवा तंत्रज्ञानाची फारशी माहिती नाही. तरीही, केवळ आत्मविश्वासाच्या जोरावर त्या एका देशातून
दुसऱ्या देशात फिरत आहेत. "मी फक्त माझ्या आयुष्याचा आनंद घेत आहे," असे त्या मोठ्या अभिमानाने सांगतात.

सध्या त्या चीनच्या एक महिन्याच्या दौऱ्यावर असून यामध्ये शांघाय, बीजिंग आणि चेंगदू यांसारख्या प्रमुख शहरांचा समावेश आहे.वृद्धत्व आले की आयुष्य संपले असे मानणाऱ्या लोकांसाठी गिल आजी एक जिवंत प्रेरणा आहेत. त्यांचा हा प्रवास केवळ पर्यटन नसून जगात अजूनही माणुसकी, प्रेम आणि विश्वास शिल्लक आहे, याचा तो एक सुंदर पुरावा आहे.