सोलापूर: लग्नाचं मागणी धुडकावल्याचा राग; ९ महिन्यांच्या गरोदर महिलेची तिच्या बाळासह निर्घृण हत्या

सोलापूर: सोलापूर शहरात एक अंगावर शहारे आणणारी घटना उघडकीस आली आहे. लग्नाचे स्थळ नाकारल्याच्या जुन्या रागातून एका माथेफिरू तरुणाने ९ महिन्यांच्या गरोदर विवाहितेची निर्घृण हत्या केली. या भीषण हल्ल्यात विवाहितेसह तिच्या पोटातील नऊ महिन्यांच्या बाळाचाही दुर्दैवी अंत झाला आहे. या घटनेने संपूर्ण सोलापूर जिल्हा हादरला असून परिसरात मोठी खळबळ उडाली आहे.

नेमकी घटना काय?
मृत विवाहितेचे नाव सोनी गणेश रामपुरे (वय १९) असून ती मूळची उत्तर सदर बाजार परिसरातील अलकुंटे चौकातील रहिवासी होती. सोनीचे लग्न एका वर्षापूर्वी झाले होते आणि ती डिलिव्हरीसाठी आपल्या माहेरी आली होती. सोनी आणि संशयित आरोपी बापू सुरेश आरगोळ (वय २६) हे एकमेकांच्या परिचयाचे होते. बापू सोनीसोबत लग्न करू इच्छित होता, मात्र त्याच्या भावाने नकार दिल्याने आणि इतर तांत्रिक कारणांमुळे सोनीच्या आईने, लक्ष्मी म्हेत्रे यांनी तिचे लग्न दुसरीकडे लावून दिले होते.

हत्येचा थरार:
रविवारी (१९ एप्रिल) सायंकाळी बापू आरगोळ याने जाणीवपूर्वक वाद उकरून काढला. तो सोनीच्या घरासमोर मोठ्या आवाजात गाणी लावून गोंधळ घालत होता. सोनी नऊ महिन्यांची गरोदर असल्याने सोनीच्या आईने त्याला आवाज कमी करण्याची विनंती केली. मात्र, लग्नाचा जुना राग मनात धरून बसलेल्या बापूने शिवीगाळ करत सोनीच्या आईला धक्काबुक्की केली.

त्यानंतर त्याने सोनीवर हल्ला केला. तिचे तोंड दाबून आणि गळा आवळून त्याने तिला भिंतीवर जोरात आदळले. हा हल्ला इतका भीषण होता की सोनीचा जागीच मृत्यू झाला. या घटनेत तिच्या पोटातील बाळाचाही जीव गेला.

पोलिसांची कारवाई:
घटनेची माहिती मिळताच सदर बाजार पोलिसांनी घटनास्थळी धाव घेतली. सोनीच्या आईच्या फिर्यादीवरून पोलिसांनी बापू आरगोळ विरोधात हत्येचा गुन्हा दाखल केला आहे. एका वर्षापूर्वी संसार सुरू केलेल्या तरुणीचा आणि तिच्या जन्माला न आलेल्या बाळाचा असा अंत झाल्याने सोलापुरात हळहळ व्यक्त केली जात आहे.