सोलापूर: व्यसनी भावाच्या जाचाला कंटाळून सख्ख्या बहिणीनेच केला खून; करमाळ्यातील धक्कादायक घटना

सोलापूर (करमाळा): सोलापूर जिल्ह्यातील करमाळा तालुक्यातून एक अतिशय धक्कादायक घटना समोर आली आहे. आपल्या भावाच्या रोजच्या दारूच्या व्यसनाला आणि जाचाला कंटाळून एका ३२ वर्षीय बहिणीनेच आपल्या ३८ वर्षीय भावाचा गळा आवळून खून केला आहे. या प्रकरणी पोलिसांनी बहीण आणि तिच्या पतीला (भावजी) अटक केली आहे.

नेमकी घटना काय?
मल्हारी पोपट कांबळे (वय ३८) असे मृत भावाचे नाव आहे. १२ एप्रिल रोजी करमाळा तालुक्यातील केम परिसरात मल्हारीचा मृतदेह आढळून आला होता. सुरुवातीला पोलिसांनी आकस्मिक मृत्यूची नोंद केली होती. मात्र, शवविच्छेदन अहवालात मल्हारीचा मृत्यू गळा आवळल्याने झाल्याचे निष्पन्न झाले. त्यानंतर तपासाची चक्रे वेगाने फिरली.

बहिणीने दिली गुन्ह्याची कबुली:
पोलिसांनी संशयावरून मल्हारीची सख्खी बहीण शीतल राजू केंगार (वय ३२) आणि तिचे पती राजेश बापू केंगार (वय ३०) यांची चौकशी केली. सुरुवातीला त्यांनी दिशाभूल करण्याचा प्रयत्न केला, मात्र पोलिसांनी कसून चौकशी केल्यावर शीतलने गुन्ह्याची कबुली दिली.

शीतलने पोलिसांना सांगितले की, तिचा भाऊ मल्हारी याला दारूचे प्रचंड व्यसन होते. तो रोज दारू पिऊन घरी यायचा आणि तिच्याशी भांडण करायचा. "तुम्ही इथून निघून जा" असे म्हणत तो तिला वारंवार मानसिक त्रास द्यायचा. ११ एप्रिल रोजी रात्रीदेखील मल्हारी दारू पिऊन आला आणि त्याने नेहमीप्रमाणे वाद सुरू केला. या रोजच्या त्रासाला वैतागलेल्या शीतलने रागाच्या भरात आपल्या ओढणीने मल्हारीचा गळा आवळला.

पुराव्यांची विल्हेवाट:
मल्हारीचा मृत्यू झाल्यानंतर शीतलचा पती राजेश तिथे आला. त्यानंतर या दोघांनी मिळून पुरावा नष्ट करण्यासाठी मल्हारीचा मृतदेह खांद्यावर घेतला आणि रानातून वाट काढत दत्तात्रय देवकर यांच्या विहिरीच्या परिसरातील एका गंजिच्या आडोशाला टाकून दिला.

करमाळा पोलिसांनी शीतल आणि राजेश या दोघांविरुद्ध हत्येचा (BNS कलम १०३(१)) गुन्हा दाखल करून त्यांना अटक केली आहे. पोलीस निरीक्षक रणजित माने या प्रकरणाचा अधिक तपास करत आहेत.