Chandrayaan-3 Update : चांद्रयान- 3 चंद्रापासून अवघ्या 25 किमी अंतरावर, आता प्रतीक्षा सॉफ्ट लँडिंगची

चंद्राच्या पृष्ठभागावर सॉफ्ट लँडिंगसाठी, चांद्रयान-3 च्या लँडरचा वेग कमी करणे सर्वात महत्वाचे आहे. लँडिंग मिशनमध्ये हे सर्वात मोठे आव्हान आहे. यापूर्वी 18 ऑगस्ट रोजी डिबूस्टिंगची पहिली प्रक्रिया करण्यात आली होती.  

रविवारी झालेल्या दुसऱ्या आणि शेवटच्या डिबूस्टिंगबद्दल  इस्रोने सांगितले की, ऑपरेशन यशस्वी झाले आणि विक्रम लँडरने कक्षा 25 किमी x 134 किमी कमी केली आहे. सॉफ्ट लँडिंगसाठी पॉवर्ड डिसेंट 23 ऑगस्ट रोजी भारतीय वेळेनुसार संध्याकाळी 5.45 वाजता सुरू होण्याची अपेक्षा आहे.

विक्रम सध्या चंद्राच्या अशा कक्षेत आहे, जिथे चंद्राचा सर्वात जवळचा बिंदू 25 किमी आहे आणि सर्वात दूर 134 किमी आहे. या कक्षेतून बुधवारी 23 ऑगस्टला चंद्राच्या दक्षिण ध्रुवावर सॉफ्ट लँडिंगचा प्रयत्न करेल. आतापर्यंत कोणतीही मोहीम दक्षिण ध्रुवावर पोहोचलेली नाही. यामुळेच इस्रोने चांद्रयान येथे पाठवले आहे

चंद्राच्या पृष्ठभागावर यशस्वीरित्या उतरल्यानंतर भारत हे यश मिळवणारा जगातील चौथा देश बनेल. आतापर्यंत फक्त अमेरिका, रशिया आणि चीन हेच देश चंद्रवर पोहचू शकले आहेत.