छत्रपती संभाजीनगर: आयपीएस बोलत असल्याचं भासवलं, अटक करण्याची भीती दाखवत ६९ वर्षीय वृद्धेला १२ लाखांनी गंडवलं!

छत्रपती संभाजीनगर: "तुमच्या नावाने सहा कोटी रुपयांची अवैध मार्गाने कमाई झालेली आहे. तुमच्या बँकेत दोन कोटी रुपये जमा आहेत. तुम्हाला अटक होईल", अशी भीती दाखवून एका ६९ वर्षीय महिलेला डिजिटल अरेस्ट प्रकरणात सायबर चोरांनी तब्बल १२ लाख रुपयांचा गंडा घातला. हा प्रकार २ ते २० मे या काळात बेगमपुरा भागात घडला.

फिर्यादी अरुणा उदय माने (६९, रा. माने बंगला, विद्युत कॉलनी, बेगमपुरा) या गृहिणी असून, पतीच्या निधनानंतर त्या घरी असतात. दरम्यान, त्यांच्या व्हॉट्सॲपवर एक कॉल आला आणि नंतर व्हिडिओ कॉल जोडण्यात आला. कॉल उचलताच समोरून "आयपीएस सुनील गौतम बोल रहा हूँ," असे सांगण्यात आले. तसेच तुमचे बँक खाते आयसीआयसीआय दिल्ली येथे असून तुमच्या नावाने सहा कोटी रुपयांचे मनी लाँड्रिंग, ड्रग्स व मानवी तस्करी झाली आहे, असे सांगत भीती निर्माण केली. तुमच्या खात्यावर दोन कोटी रुपये जमा झालेले असून तुम्हाला अटक करणार असल्याची धमकी देण्यात आली.

 

ऑनलाइन चौकशीही झाली सुरू:
सदर महिलेने घबराटीत तिच्या मुलीला बोलावून घेतले. त्यानंतर ३ मे रोजी दुपारी ५ वाजता सायबर भामट्यांनी महिला आणि तिच्या मुलीची ऑनलाइन चौकशी सुरू केली. "तुमच्या आजूबाजूला कोणी व्यक्ती अचानक श्रीमंत झाली आहे का? गेल्या वर्षात तुम्ही प्रवास कुठे कुठे केला?" असे प्रश्न विचारत त्यांना मानसिक दबावाखाली ठेवले.

भितीपोटी १२ लाख रुपये ट्रान्सफर झाल्यानंतर ही रक्कम २ जूनपर्यंत परत मिळेल, अशी थाप चोरांनी मारली. मात्र, २ जूनपर्यंत पैसे न आल्याने आणि फसवणूक झाल्याचे लक्षात आल्यावर ६९ वर्षीय महिलेने एनसीसीआरपी पोर्टलवर ऑनलाइन तक्रार दाखल केली. तसेच फसवणूक करणाऱ्या मोबाईलधारक क्रमांक (९५३२५००३०१) च्या विरोधात बेगमपुरा पोलीस ठाण्यात गुन्हा दाखल करण्यात आला असून, पोलीस निरीक्षक प्रवीणा यादव या प्रकरणाचा अधिक तपास करत आहेत.