डोंबिवलीत पोलिसांचा मध्यरात्री थरार! पलावा सिटीत शेकडो पोलिसांचे कॉम्बिंग' २४ नायजेरियन नागरिक ताब्यात, एकीची ४ थ्या मजल्यावरून उडी

डोंबिवलीतील मानपाडा पोलीस ठाण्याच्या हद्दीतून एक अत्यंत मोठी आणि खळबळजनक बातमी समोर आली आहे. खोणी परिसरातील प्रसिद्ध पलावा सिटी (डाऊन टाऊन आणि क्राऊन पलावा) वसाहतीमध्ये ठाणे आणि नवी मुंबई पोलिसांनी संयुक्तपणे एक अत्यंत मोठी मोहीम राबवली आहे. शनिवारी मध्यरात्री ३ वाजेपासून ते सकाळी १० वाजेपर्यंत चाललेल्या या धडक कॉम्बिंग ऑपरेशनमध्ये (Combing Operation) पोलिसांनी तब्बल २४ नायजेरियन नागरिकांना ताब्यात घेतले आहे. या धडक कारवाईमुळे संपूर्ण डोंबिवली आणि कल्याण परिसरात प्रचंड खळबळ उडाली आहे.

मिळालेल्या माहितीनुसार, पलावा परिसरात अनेक परदेशी नागरिक बेकायदेशीरपणे आणि संशयास्पद रित्या वास्तव्य करत असल्याची गोपनीय माहिती पोलिसांना मिळाली होती. या माहितीच्या आधारे कल्याण परिमंडळाचे पोलीस उपायुक्त (DCP) अतुल झेंडे यांच्या मार्गदर्शनाखाली मानपाडा पोलीस आणि नवी मुंबई पोलिसांच्या पथकांनी संपूर्ण पलावा सिटी परिसराला वेढा घातला. शेकडो पोलिसांच्या उपस्थितीत एकाच वेळी अनेक इमारतींमध्ये झाडाझडती सुरू करण्यात आली.

१४ पुरुष, ६ महिला आणि ४ लहान मुलांचा समावेश:
या सात तासांच्या मॅरेथॉन कारवाई दरम्यान पोलिसांनी एकूण २४ नायजेरियन नागरिकांना ताब्यात घेतले. यामध्ये १४ पुरुष, ६ महिला आणि ४ लहान मुलांचा समावेश आहे. पोलिसांनी जेव्हा त्यांच्याकडे भारतात राहण्याबाबतच्या अधिकृत कागदपत्रांची मागणी केली, तेव्हा धक्कादायक बाबी समोर आल्या. ताब्यात घेतलेल्यांपैकी ८ जणांकडे भारतात वास्तव्यासाठी आवश्यक असलेला वैध व्हिसा किंवा कोणतेही अधिकृत पासपोर्ट-कागदपत्रे आढळून आली नाहीत. म्हणजेच ते बेकायदेशीरपणे येथे राहत होते.

९ जणांवर ड्रग्ज तस्करांचे गुन्हे; कारवाई दरम्यान महिला पोलिसांच्या हातावर तुरी देऊन फरार होण्याचा प्रयत्न:
अधिक तपासात समोर आले की, ताब्यात घेतलेल्या २४ पैकी ९ नायजेरियन नागरिकांवर यापूर्वीच राज्यातील विविध पोलीस ठाण्यांमध्ये अमली पदार्थ तस्करी (Drugs Smuggling) आणि इतर गंभीर स्वरूपाचे गुन्हे दाखल आहेत. दरम्यान, पोलिसांची ही छापेमारी सुरू असताना एका नायजेरियन महिलेने पोलिसांच्या तावडीतून सुटण्यासाठी इमारतीच्या चौथ्या मजल्यावरून थेट खाली उडी मारली. या थरारक घटनेत ती महिला गंभीर जखमी झाली असून, तिला तातडीने उपचारासाठी रुग्णालयात दाखल करण्यात आले आहे, जिथे तिच्यावर कडक पोलीस बंदोबस्तात उपचार सुरू आहेत.

पोलीस उपायुक्त अतुल झेंडे यांनी सांगितले की, या सर्व परदेशी नागरिकांच्या व्हिसा आणि पासपोर्टची सखोल पडताळणी सुरू आहे. तसेच, ज्या घरमालकांनी किंवा एजंटांनी पोलीस पडताळणी (Police Verification) न करता आणि नियमांचे उल्लंघन करून या परदेशी नागरिकांना घरे भाड्याने दिली होती, त्यांच्यावरही मानपाडा पोलीस ठाण्यात कडक कायदेशीर गुन्हे दाखल केले जाणार आहेत. या परिसरात अमली पदार्थांचे रॅकेट सक्रिय आहे का, याचाही सखोल तपास पोलीस करत आहेत.