पुणे: वाहतूक कोंडीवर 'एआय'चा उतारा! ५०० स्मार्ट कॅमेऱ्यांद्वारे होणार स्वयंचलित नियंत्रण;

पुणे: वाढती वाहतूक कोंडी सोडवण्यासाठी पुणे वाहतूक पोलीस आता तंत्रज्ञान, तज्ज्ञांचा सल्ला आणि नागरिकांचा सहभाग या त्रिसूत्रीवर भर देत आहेत. शहरात लवकरच 'कृत्रिम बुद्धिमत्ते'वर (AI) आधारित ५०० कॅमेरे बसवण्यात येणार असून, मुंबईच्या धर्तीवर अत्याधुनिक वाहतूक नियंत्रण प्रणाली कार्यान्वित केली जाणार असल्याची माहिती अतिरिक्त पोलीस आयुक्त मनोज पाटील यांनी दिली आहे.

काय आहे हा प्रकल्प?

इंटेलिजंट ट्रॅफिक मॅनेजमेंट सिस्टीम (ITMS): वाहतुकीचे स्वयंचलित नियमन करण्यासाठी वाहतूक शाखेने 'आयटीएमएस' हा प्रकल्प तयार केला असून, त्याचा अहवाल सध्या मंजुरीसाठी सरकारकडे पाठवण्यात आला आहे.

स्वयंचलित दंडात्मक कारवाई: हे 'एआय' कॅमेरे वाहतूक नियमांचे उल्लंघन करणाऱ्यांवर मानवी हस्तक्षेपाशिवाय थेट आणि स्वयंचलित दंडात्मक कारवाई करतील.

आरोग्य आणि तणावाचा विचार: पुण्याची वाहतूक कोंडी ही आता केवळ रस्त्यांची समस्या उरलेली नाही, तर ती नागरिकांच्या आरोग्याशी आणि मानसिक तणावाशी जोडली गेली आहे, असे मत या विषयावर आयोजित परिषदेत व्यक्त करण्यात आले.

पुणे शहर जिल्हा काँग्रेसच्या पश्चिम विभागाच्या वतीने आयोजित 'पुणे ट्रॅफिक परिषदेत' ही माहिती देण्यात आली. या परिषदेला पोलीस अधिकारी, पीएमपीचे प्रतिनिधी, मेट्रो अधिकारी आणि विविध क्षेत्रांतील तज्ज्ञ उपस्थित होते. यामध्ये सार्वजनिक वाहतूक अधिक सक्षम करण्यासाठी ब्राझीलमधील 'बीआरटी' (BRT) मॉडेलचा दाखलाही देण्यात आला.