घाईघाईत उद्घाटन अन् २४ तासांत दोन अपघात; रक्षक चौकातील उड्डाणपुलावर वाहनांची चक्रावून टाकणारी 'धडक'

पुणे: औंध-रावेत बीआरटीएस (BRTS) मार्गावरील वाहतुकीच्या दृष्टीने अत्यंत महत्त्वपूर्ण मानल्या जाणाऱ्या पिंपरी-चिंचवडमधील रक्षक चौकातील बहुप्रतीक्षित उड्डाणपुलाचे काम अखेर पूर्ण झाले असून, तो नागरिकांसाठी खुला करण्यात आला आहे. गेल्या अनेक महिन्यांपासून या चौकात होणाऱ्या प्रचंड वाहतूक कोंडीचा सामना करणाऱ्या वाहनचालकांना यामुळे मोठा दिलासा मिळाला आहे.

मात्र, महापालिका प्रशासनाने कोणत्याही औपचारिक उद्घाटनाच्या तारखेची किंवा व्हीआयपी नेत्यांच्या वेळेची प्रतीक्षा न करता, परिस्थितीचे गांभीर्य ओळखून शुक्रवारी रात्रीच हा उड्डाणपूल अचानक वाहतुकीसाठी खुला केला. परंतु, हा पूल सुरू होताच अवघ्या २४ तासांच्या आत यावर दोन मोठे अपघात झाल्याची धक्कादायक माहिती समोर आली आहे.किरकोळ आणि तांत्रिक कामे शिल्लक असतानाच घाईघाईत पूल सुरू केल्यामुळे नागरिकांमधून आता तीव्र नाराजी व्यक्त केली जात आहे. मिळालेल्या माहितीनुसार, उड्डाणपूल सुरू झाल्यानंतर पहिल्या २४ तासांतच एका कारचा भीषण अपघात होऊन ती थेट रस्त्यावर उलटली, तर दुसऱ्या एका घटनेत दुचाकी आणि चारचाकी वाहनामध्ये जोरदार धडक झाली. सुदैवाने या दोन्ही अपघातांमध्ये कोणतीही जीवितहानी झाली नाही, परंतु वाहनांचे मोठे नुकसान झाले आहे. पुलाचा उतार अत्यंत तीव्र आणि धोकादायक असल्यामुळे वाहनचालकांचे नियंत्रण सुटत असल्याचे स्थानिक नागरिकांचे म्हणणे आहे.

किरकोळ आणि सुरक्षेच्या कामांकडे दुर्लक्ष केल्यामुळेच हे अपघात घडल्याचा आरोप केला जात असून, भविष्यात पुण्यातील नवले पुलासारखी मोठी दुर्घटना येथे घडू नये, अशी भीती व्यक्त केली जात आहे.
वाहतूक कोंडीतून सुटका झाली असली तरी सुरक्षेच्या त्रुटींमुळे आता या पुलाची संपूर्ण पुण्यात जोरदार चर्चा सुरू झाली आहे.