कोल्हापूर: धावत्या ई-बाईकचा थरार! अवघ्या तीन महिन्यांपूर्वी घेतलेली इलेक्ट्रिक दुचाकी रस्त्यातच जळून खाक; महिलेचा टळला अनर्थ

कोल्हापूर: साने गुरुजी वसाहत परिसरातील सर्वे कॉलनीतील महादेव मंदिरासमोर चालू इलेक्ट्रिक बाईक पूर्णपणे जळून खाक झाल्याची घटना मंगळवारी सायंकाळी घडली. बाईकवरील महिलेने तत्काळ गाडीवरून उतरल्याने मोठा अनर्थ टळला. येथील धीरज विकास भुरे यांच्या मालकीची इलेक्ट्रिक बाईक त्यांच्या पत्नी प्राची भुरे या कामानिमित्त बाहेर घेऊन गेल्या होत्या. घराकडे जाताना रात्री पावणे आठच्या सुमारास अचानक गाडीतून धूर येऊ लागल्याने त्यांनी रस्त्याच्या कडेला बाईक थांबवली. काही क्षणातच दुचाकीने मोठा पेट घेतला.

नागरिकांनी महानगरपालिका अग्निशमन दलास पाचारण केले. जवानांनी तातडीने तेथे येऊन पाणी मारून आग आटोक्यात आणली. या मोपेडमध्ये एक मोबाइल व ३० हजार रुपयांची रोकड होती. यात धीरज भुरे यांचे सव्वा लाख रुपयांचे नुकसान झाले.भुरे यांनी तीन महिन्यांपूर्वी ही दुचाकी खरेदी केली होती. चालू दुचाकीला नेमकी कशामुळे आग लागली याचे कारण समजू शकले नाही. अग्निशमन दलाचा बंब येईपर्यंत मोपेड जळून आगीचे लोट उसळले होते. चालक देवानंद कांबळे, फायरमन गिरीश गवळी व श्रीधर चाचे यांनी ही आग विझवली. दरम्यान जुना राजवाडा पोलिस ठाण्याचे कर्मचारी तातडीने तेथे आले, त्यांनी मोपेड मालकाकडे चौकशी केली. रात्री उशिरापर्यंत तक्रार दाखल करण्याचे काम सुरु होते.

काही मिनिटात खाक
या दुचाकीला आग लागल्यानंतर अवघ्या काही मिनिटात ती पूर्णपणे जळून खाक झाली. आगीचे लोट परिसरात पसरल्याने नागरिकांमध्ये भीती पसरली होती. नेमकी कोणत्या भागात आग लागली हे पाहण्यासाठी नागरिकांनी राधानगरी रस्त्यावर गर्दी केली होती.