छत्रपती संभाजीनगर: 'तुझी बहीण माझ्याशीच बोलते'; संशयास्पद कारणावरून तरुण घरात घुसून ठार!

छत्रपती संभाजीनगर: शहरातील गारखेडा परिसरातील साईनगर भागातून हत्येची एक अत्यंत धक्कादायक आणि थरारक घटना समोर आली आहे. बहिणीशी बोलण्यावरून आणि संशयास्पद वादातून एका १९ वर्षीय तरुणाची घरात घुसून अतिशय निर्घृणपणे हत्या करण्यात आली. या घटनेमुळे संपूर्ण गारखेडा परिसरात मोठी खळबळ उडाली असून नागरिकांमध्ये भीतीचे वातावरण पसरले आहे.

नक्की काय घडली घटना?

मिळालेल्या माहितीनुसार, मयत तरुणाचे नाव तौसिफ शमीम शेख (वय १९, रा. साईनगर, गारखेडा परिसर, छत्रपती संभाजीनगर) असे आहे. तो सेंट्रिंगचे काम करून आपल्या आई-वडिलांना आणि कुटुंबाला आर्थिक हातभार लावत होता. तर आदित्य शेळके (रा. साईनगर, गारखेडा परिसर) असे संशयित आरोपीचे नाव आहे. मयत तरुणाचा चुलत भाऊ मुजम्मील जमील शेख याने दिलेल्या फिर्यादीवरून याप्रकरणी पोलिसांत गुन्हा दाखल करण्यात आला आहे.

आरोपी आदित्य शेळके याने तौसिफसोबत 'तुझी बहीण माझ्याशीच बोलते' अशा संशयास्पद कारणावरून जोरदार वाद घातला होता. या वादानंतर निघून जाताना आरोपीने तौसिफला 'आज तुला सोडणार नाही' अशी उघड धमकी दिली होती.

रक्ताच्या थारोळ्यात कोसळला तरुण

धमकी दिल्यानंतर काही वेळातच संतापलेला आदित्य तौसिफच्या घरात घुसला आणि त्याने अचानक धारदार चाकूने तौसिफवर प्राणघातक हल्ला केला. चाकूच्या जोरदार वारांमुळे तौसिफ गंभीर जखमी होऊन रक्ताच्या थारोळ्यात खाली कोसळला. तरीही आरोपीचा राग शांत झाला नाही; त्याने खाली पडलेल्या तौसिफच्या चेहऱ्यावर आणि डोक्यावर चाकूने सपासप वार करणे सुरूच ठेवले.

कुटुंबीयांचा आणि आजूबाजूच्या नातेवाईकांचा आरडाओरडा ऐकून लोक मदतीसाठी धावून आले. लोक जमा होत असल्याचे पाहताच आरोपी आदित्य शेळके घटनास्थळावरून पसार झाला. गंभीर जखमी झालेल्या तौसिफला तातडीने उपचारासाठी रुग्णालयात नेण्यात आले, मात्र उपचारापूर्वीच त्याचा करुण अंत झाला होता. एकाच क्षणात आपल्या पोटच्या लेकाला गमावल्यामुळे आई-वडिलांना प्रचंड धक्का बसला आहे. या घटनेची माहिती मिळताच पोलिसांनी घटनास्थळी धाव घेऊन गुन्हा दाखल केला असून आरोपीचा कसून शोध सुरू केला आहे.