पुणे: बस स्थानकाचा रस्ता अवघ्या सहा महिन्यांत खड्ड्यात; कंत्राटदाराला जाब विचारत परिवहन मंत्री प्रताप सरनाईक यांचे दंडात्मक व कठोर कारवाईचे आदेश

पुणे: स्टेशन बसस्थानकातील रस्त्याचे काम अवघ्या सहा महिन्यांत उखडून त्यावर खड्डे पडल्याने परिवहन मंत्री प्रताप सरनाईक यांनी नाराजी व्यक्त केली. खड्डे तातडीने बुजवण्याबरोबरच रस्त्याच्या कामाची जबाबदारी असलेल्या ठेकेदाराला जाब विचारण्याचे आदेश त्यांनी एसटी प्रशासनाला दिले. सरनाईक यांनी शुक्रवारी (दि. १४)) पुणे स्टेशन बसस्थानकाची पाहणी केली. या वेळी बसस्थानकातील रस्त्यावर पडलेल्या खड्ड्यांची त्यांनी पाहणी करून अधिकाऱ्यांकडून त्याबाबत माहिती घेतली. नव्याने करण्यात आलेल्या कामाची अल्पावधीतच दुरवस्था झाल्याबद्दल त्यांनी प्रशासनाला जाब विचारला.

पाहणीदरम्यान त्यांनी हिरकणी कक्ष, पाणपोई, प्रसाधनगृह तसेच प्रवाशांसाठी उपलब्ध असलेल्या अन्य मूलभूत सुविधांचीही पाहणी केली. बसस्थानकात स्वच्छता आणि प्रवाशांना देण्यात येणाऱ्या सुविधांमध्ये त्रुटी आढळल्याने त्यांनी अधिकाऱ्यांना आवश्यक त्या सुधारणा तातडीने करण्याच्या सूचना दिल्या. बसस्थानकांवर प्रवाशांना सुरक्षित, स्वच्छ आणि दर्जेदार सुविधा मिळायलाच हव्यात. स्वच्छता हा प्रवाशांचा मूलभूत अधिकार असून, याबाबत कोणतीही हयगय अथवा निष्काळजीपणा खपवून घेतला जाणार नाही."

प्रवाशांकडून थेट अभिप्राय
सरनाईक यांनी बसस्थानकातील प्रवाशांशी संवाद साधला. एसटीच्या बससेवेचा अनुभव, प्रवासातील अडचणी, बससेवेची गुणवत्ता तसेच बसस्थानकातील सुविधांबाबत त्यांनी प्रवाशांकडून थेट अभिप्राय घेतला. एसटी ही सर्वसामान्यांच्या जीवनाचा अविभाज्य भाग आहे. त्यामुळे प्रवाशांना चांगली बससेवा देण्याबरोबरच बसस्थानकांवर स्वच्छ आणि सन्मानजनक वातावरण उपलब्ध करून देणे ही महामंडळाची प्राथमिक जबाबदारी आहे', असे त्यांनी अधोरेखित केले. यावेळी विभाग नियंत्रक अरुण सिया, विभागीय वाहतूक अधिकारी कमलेश धरनाळे यांच्यासह एसटीचे अधिकारी उपस्थित होते.