राजगड: गोळीबाराने खळबळ! ४७ वर्षीय व्यक्तीवर झाडली गोळी; आरोपीला पोलिसांकडून अवघ्या ८ तासांत अटक!

राजगड: वेल्हे-नसरापूर रस्त्यावरील कातुर्डेवाडीजवळ जुन्या भांडणाच्या वादातून ४७ वर्षीय व्यक्तीवर गोळीबार केल्याची घटना घडली. या प्रकरणातील फरार आरोपी ओंकार बाळू जाधव (रा. मालवली) याला वेल्हे पोलिसांनी अवघ्या आठ तासांत अटक केली. या गोळीबारात विजय मारुती वसवे (वय ४७, रा. मालवली) हे गंभीर जखमी झाले असून, त्यांच्यावर पुण्यातील ससून रुग्णालयात उपचार करण्यात आले.

पोलिसांनी दिलेल्या माहितीनुसार, मंगळवारी (१३ ऑक्टोबर) सायंकाळी साडेसहाच्या सुमारास ही घटना घडली. जुन्या भांडणाच्या कारणावरून आरोपी ओंकार जाधव याने विजय वसवे यांच्या पाठीमागून येत त्यांच्यावर गोळीबार केला. या हल्ल्यात वसवे गंभीर जखमी झाले. गोळीबारानंतर आरोपी घटनास्थळावरून फरार झाला. गोळीबारात जखमी झालेल्या विजय वसवे यांना तातडीने वेल्हे ग्रामीण रुग्णालयात दाखल करण्यात आले. तेथे प्राथमिक उपचार केल्यानंतर त्यांना पुढील उपचारांसाठी पुण्यातील ससून रुग्णालयात हलविण्यात आले. रुग्णालयात शस्त्रक्रिया करून त्यांच्या पाठीमध्ये लागलेली गोळी काढण्यात आली.

सीसीटीव्ही आणि गोपनीय माहितीच्या आधारे आरोपीचा शोध

गोळीबार करून आरोपी फरार झाल्यानंतर वेल्हे पोलिसांनी त्याचा शोध घेण्यासाठी स्वतंत्र तपास पथके तयार केली. परिसरातील सीसीटीव्ही फुटेजची तपासणी करण्यात आली. तसेच गोपनीय माहितीच्या आधारे पोलिसांनी आरोपीचा माग काढला. या तपासादरम्यान पोलिसांनी अवघ्या आठ तासांत ओंकार जाधव याला ताब्यात घेतले.

या प्रकरणी वेल्हे पोलीस ठाण्यात भारतीय न्याय संहिता कलम १०९ (१), शस्त्र अधिनियम कलम ३ (२५) आणि महाराष्ट्र पोलीस अधिनियम कलम १३५ अन्वये गुन्हा दाखल करण्यात आला आहे. आरोपीविरुद्ध पुढील कायदेशीर कारवाई सुरू असल्याची माहिती पोलिसांनी दिली.

पुणे ग्रामीणचे पोलीस अधीक्षक संदीपसिंह गिल्ल, अपर पोलीस अधीक्षक शुभम कुमार आणि हवेली विभागाचे उपविभागीय पोलीस अधिकारी किरणकुमार सूर्यवंशी यांच्या मार्गदर्शनाखाली ही कारवाई करण्यात आली. वेल्हे पोलीस ठाण्याचे प्रभारी अधिकारी किशोर शेवते, पोलीस उपनिरीक्षक अमित देशमुख तसेच पोलीस हवालदार ज्ञानदीप धिवार, सोमेश राऊत, अजय शिंदे, आकाश पाटील, राजेंद्र आवदे, शुभम कदम आणि अजय गार्डी यांच्या पथकाने आरोपीला पकडण्यासाठी महत्त्वाची भूमिका बजावली.