बीड: रस्तेरविना दुर्दैवी अंत; सर्पदंश झालेल्या १२ वर्षांच्या चिमुकलीचा उपचाराअभावी वाटेतच मृत्यू!

बीड: केज तालुक्यात डोंगरात दुर्गम ठिकाणी असलेल्या गौरवाडी वस्तीत घराजवळ खेळतांना मंगळवारी सायंकाळी ६ वाजता सुप्रिया बबरू घाडगे (वय १२ रा. गौरवाडी) या मुलीस सर्पदंश झाला. वाडीला रस्ता नसल्याने दुचाकीवरून रुग्णालयापर्यंत पोहोचण्यास उशीर झाल्याने वाटेत तिचा मृत्यू झाल्याची घटना मंगळवारी रात्री आठ वाजता घडली.

गौरवाडी येथील जिल्हा परिषद प्राथमिक शाळा, गौरवाडी येथील सातवीच्या वर्गात शिक्षण घेणारी सुप्रिया घाडगे ही मंगळवारी शाळा सुटल्यानंतर गौरवाडी वस्तीवरील तिच्या घराबाहेरील परिसरात खेळत असताना सापाने तिला दंश केला. याची माहिती मिळताच तिचे काका आणि भावाने तिला दुचाकीवर बसवून मंगळवारी रात्री थेट नेकनूर येथील कुटीर रुग्णालयात नेले. रुग्णालयात डॉ. अशोक हुबेकर यांनी तपासणी करून रात्री आठ वाजता तिला मृत घोषित केले.

गौरवाडीपर्यंत रस्ताच नाही, केवळ पाऊलवाट
केज तालुक्यातील गौरवाडी वस्ती ही दुर्गम भागात असुन या वाडीपर्यंत पाऊल वाटेचा रस्ता आहे, केवळ दुचाकी येते. गावातही वाहनाची कुठलीच सोय नाही. केवळ गावातील रस्ता चांगला नसल्याने कुटुंबीयांना सुप्रियाला वेळेत रुग्णालयात नेता आले नाही. गावापर्यंत चारचाकी वाहन येत नसल्याने ग्रामस्थांनी १०८ क्रमांकही डायल केला नाही.

वडीलांचा दोन वर्षापूर्वीच अपघाती मृत्यू
सुप्रियाचे वडील बबरू घाडगे यांचा दोन वर्षांपूर्वी अपघाती मृत्यू झाला असून तिची आई ऊसतोडणी करून पाच मुली आणि एका मुलाचा सांभाळ करीत आहे. आई साखर कारखान्यावर ऊसतोडणीला जाण्याच्या तयारीत असतानाच सुप्रीयाचा मृत्यू झाल्याने कुटुंबावर शोककळा पसरली आहे.
विडा प्राथमिक आरोग्य केंद्रात लस होती

आमच्या प्राथमिक आरोग्य केंद्रात ३० रूग्णांना पुरेल एवढी सर्पदंशाची लस उपलब्ध होती. आमच्याकडे सदरील रुग्ण आला नाही. आमच्याकडे गंभीर रुग्ण आला तर लस देऊन आम्ही बीडला अतीदक्षता विभागात पाठवतो
- अभिषेक थोरात, वैद्यकीय अधिकारी, विडा