शरद पवार पुन्हा हॉस्पिटलमध्ये, कारण काय? प्रकृतीबाबत ताजी अपडेट समोर

राष्ट्रवादी काँग्रेसचे शरद पवार गटाचे अध्यक्ष शरद पवार यांच्या प्रकृतीबद्दल एक नवीन अपडेट समोर आली आहे. शरद पवार आज पुन्हा एकदा पुण्यातील रुबी हॉल क्लिनिक येथे सविस्तर तपासणी करण्यासाठी जाणार आहे.. गेल्या आठवड्यात छातीत संसर्ग आणि खोकल्याच्या त्रासामुळे शरद पवार यांना याच रुग्णालयात दाखल करण्यात आले होते. त्यांना उपचार पूर्ण करून डिस्चार्ज देण्यात आला होता. त्यावेळी डॉक्टरांनी त्यांना नियोजित फॉलोअप तपासणी (Routine Follow-up) करण्याचा सल्ला देण्यात आला होता. त्याच तपासणीसाठी आज ते रुग्णालयात जाणार आहे.

काही दिवस विश्रांतीचा सल्ला

शरद पवार यांना दुसऱ्या आठवड्यात सततचा खोकला आणि श्वसन घेण्यास त्रास होत होता. या त्रासामुळे त्यांना बारामतीहून तातडीने पुण्याला हलवण्यात आले होते. तिथे त्यांना पाच दिवसांचा अँटिबायोटिकचा कोर्स पूर्ण करण्यात आला. यानंतर शनिवारी १४ फेब्रुवारी रोजी त्यांना डिस्चार्ज देण्यात आला होता. त्यांच्या प्रकृतीत पूर्ण सुधारणा झाली असली तरी वय आणि कामाचा व्याप लक्षात घेता डॉक्टरांनी त्यांना काही दिवस विश्रांतीचा सल्ला दिला आहे. त्यासोबत डॉक्टरांनी त्यांना पुन्हा एकदा तपासणीचा सल्ला दिला होता.

शरद पवार पुन्हा काम कधी सुरु करणार?

रुबी हॉल क्लिनिकचे मुख्य हृदयरोगतज्ज्ञ डॉ. परवेझ ग्रँट आणि डॉ. अभिजित लोढा यांच्या नेतृत्वाखालील टीम आज शरद पवांराच्या प्रकृतीची तपासणी करणार आहेत. शरद पवार यांचे सर्व महत्त्वाचे पॅरामीटर्स (Vitals) सध्या सामान्य आहेत. छातीतील संसर्ग आता पूर्णपणे बरा झाला आहे. ही केवळ ‘प्रिव्हेंटिव्ह चेकअप’ची पायरी असून जेणेकरून ते पुन्हा सक्रिय कामाला सुरुवात करू शकतील, अशी माहिती समोर आली आहे.

दरम्यान रुग्णालयात तपासणीसाठी येत असताना, इतर रुग्णांना कोणताही त्रास होऊ नये म्हणून कार्यकर्त्यांनी रुग्णालयात गर्दी करू नये, असे आवाहन खासदार सुप्रिया सुळे आणि आमदार रोहित पवार यांनी केले आहे. तपासणीनंतर शरद पवार काही काळ पुण्यातच विश्रांती घेण्याची शक्यता वर्तवली जात आहे. त्यानंतर ते त्यांच्या पूर्वनियोजित राजकीय दौऱ्यांकडे वळतील, अशी माहिती समोर येत आहे.

[embedded content]