पुणे: लग्नाचं आमिष दाखवून फसवणूक केल्याचा आरोप करत महिलेचा सर्वसाधारण सभेत आत्मदहनाचा प्रयत्न

पुणे: जिल्हा परिषदेच्या सभागृहात सर्वसाधारण सभा सुरू असताना एका महिलेने अंगावर पेट्रोल ओतून आत्मदहनाचा प्रयत्न केल्याची धक्कादायक घटना घडली आहे. राष्ट्रवादी काँग्रेसचे बारामतीचे जिल्हा परिषद सदस्य मंगेश जगताप यांच्यावर लग्नाचं आमिष दाखवून फसवणूक केल्याचा गंभीर आरोप या महिलेने केला आहे. या घटनेमुळे सभागृहातील सदस्यांसह पदाधिकाऱ्यांमध्ये मोठी खळबळ उडाली.

जिल्हा परिषदेच्या २०२६-२७ च्या पुरवणी मागण्यांवर चर्चा करण्यासाठी बोलविण्यात आलेल्या सर्वसाधारण सभेदरम्यान हा प्रकार घडला. सभा सुरू असताना अचानक एक महिला सभागृहात आली आणि तिने आरडाओरडा करण्यास सुरुवात केली. त्यानंतर तिने स्वतःसोबत आणलेले पेट्रोल अंगावर ओतून संपवण्याचा प्रयत्न केला. मात्र, प्रसंगावधान राखत सभागृहाबाहेरील सुरक्षारक्षक आणि सेवकवर्गाने तातडीने धाव घेऊन महिलेच्या हातातील पेट्रोलची बाटली व शेजारील साहित्य ताब्यात घेतले.

 

अचानक घडलेल्या या प्रकारामुळे काही काळ एकच गोंधळ उडाला. उपस्थित महिला व बालकल्याण सभापती अंकिता पाटील, आरोग्य व बांधकाम विभागाच्या सभापती दीपाली हुलावळे यांच्यासह काही सदस्यांनी त्या महिलेला शांत करण्याचा प्रयत्न केला. त्यानंतर सुरक्षारक्षक आणि पोलिसांनी तिला तातडीने ताब्यात घेऊन सुरक्षेच्या दृष्टीने 'हिरकणी कक्षात' हलवले. प्रकृती बिघडल्याने तिला प्राथमिक उपचार करून पुढील उपचारासाठी रुग्णालयात पाठविण्यात आले आहे.

या घटनेनंतर जिल्हा परिषद अध्यक्ष वीरधवल जगदाळे यांनी प्रशासनाला खडेबोल सुनावले असून, सुरक्षा व्यवस्था अधिक कडक करण्याचे आदेश दिले आहेत. तसेच, सभागृहात सदस्यांशिवाय इतर कोणालाही प्रवेश देऊ नका, अशाक्त आणि कठोर सूचनाही त्यांनी प्रशासनाला दिल्या आहेत. याप्रकरणी बंडगार्डन पोलीस ठाण्यात आवश्यक ती कायदेशीर प्रक्रिया सुरू असल्याची माहिती वरिष्ठ पोलीस निरीक्षक संतोष पांढरे यांनी दिली आहे.