पुणे: विद्यापीठात बोगस डिग्रीचा मोठा घोटाळा उघड! ३ लाखांत विकली जात होती बीकॉमची पदवी

पुणे: 'ऑक्सफर्ड ऑफ द ईस्ट' अशी ओळख असलेल्या सावित्रीबाई फुले पुणे विद्यापीठात अधिकारी आणि कर्मचारी चक्क पैसे घेऊन बनावट डिग्री प्रमाणपत्र देत असल्याचा धक्कादायक प्रकार उघडकीस आला आहे. एका रिक्षावाल्याच्या सतर्कतेमुळे विद्यापीठातील हे रॅकेट उघडकीस आले असून, पुणे विद्यापीठातील बनावट डिग्री रॅकेटचा पर्दाफाश कसा झाला हे समोर आले आहे.

रिक्षा चालवून उदरनिर्वाह करणाऱ्या महेश कदम हे सावित्रीबाई फुले पुणे विद्यापीठात मुलाच्या उच्च शिक्षणासंदर्भात चौकशी करण्यासाठी गेले होते. त्यावेळी वित्त व लेखा विभागातील रमेश मुखेकर या अधिकाऱ्याने त्याच्या अन्य ३ ते ४ साथीदारासह महेश कदम यांना ३ लाख रुपयांत बीकॉमची डिग्री सर्टिफिकेट देण्याचे कबुल केले. परंतु, 'युनिव्हर्सिटी ऑफ पुणे' असे नाव असलेली बीकॉमची डिग्री सर्टिफिकेट दिल्यानंतर महेश कदम यांना संशय आला. त्यांनी, 'सावित्रीबाई फुले पुणे विद्यापीठ' असे नाव असताना 'युनिव्हर्सिटी ऑफ पुणे' या नावाने डिग्री सर्टिफिकेट का देता? अशी विचारणा केली.

 

मुखेकर यांनी कदम यांना वेगवेगळ्या वर्षांचे चार डिग्री सर्टिफिकेट दिल्यामुळे कदम यांचा संशय बळावला. त्यांनी ही बाब विद्यापीठ प्रशासनाच्या निदर्शनास आणून दिली. तातडीने संबंधित अधिकारी आणि कर्मचाऱ्यांवर गुन्हे दाखल करून कठोर कारवाई करण्याची मागणी देखील त्यांनी केली आहे. या प्रकारानंतर विद्यापीठ वर्तुळात मोठी खळबळ उडाली असून संबंधित अधिकारी व कर्मचाऱ्यांविरोधात खातेअंतर्गत चौकशी सुरू करण्यात आली आहे.