शिवभोजन थाळी चालकांची चंद्रशेखर बावनकुळेंसमोर जोरदार घोषणाबाजी! नेमकं काय घडलं?

नागपूर येथे मंत्री चंद्रशेखर बावनकुळे यांच्यासमोर शिवभोजन थाळी केंद्र चालकांनी जोरदार घोषणाबाजी करत आपले प्रलंबित बिल आणि अनुदान मिळवण्यासाठी आंदोलन केले. गेल्या चार ते सहा महिन्यांपासून थकीत असलेले बिल न मिळाल्याने शिवभोजन थाळी केंद्र चालक आक्रमक झाले होते. आंदोलकांनी आपले निवेदन मंत्री बावनकुळे यांना दिले. यावेळी पोलीस आणि घोषणाबाजी करणाऱ्या चालकांमध्ये काही प्रमाणात झटापट देखील झाली.

मंत्री बावनकुळे यांनी आंदोलकांचे म्हणणे ऐकून घेतले आणि त्यांना त्वरित पैसे मिळवून देण्याचे आश्वासन दिले. त्यांनी सांगितले की, ते तात्काळ मुख्यमंत्री महोदय आणि छगन भुजबळ यांच्याशी या विषयावर चर्चा करतील. शिवभोजन थाळी केंद्र चालकांना त्यांचे प्रलंबित असलेले पैसे लवकरात लवकर मिळतील यासाठी आपण स्वतः पुढाकार घेऊ, असेही बावनकुळे यांनी नमूद केले. या आंदोलनामुळे शिवभोजन थाळी योजनेतील थकीत बिलांचा मुद्दा पुन्हा एकदा ऐरणीवर आला आहे.