भारतासाठी सर्वात मोठा दिलासा! 'होर्मुझ' जलमार्ग खुला होताच ४० एलपीजी टँकर्स भारताकडे रवाना, गॅस-इंधन स्वस्त होणार?

नवी दिल्ली: फेब्रुवारी महिन्यापासून इराण आणि अमेरिका यांच्यात सुरू असलेल्या तीव्र संघर्ष आणि तणावामुळे भारतासह जागतिक अर्थव्यवस्थेला मोठा फटका बसला होता. या युद्धाच्या पार्श्वभूमीवर जागतिक इंधन पुरवठ्यासाठी अत्यंत महत्त्वाचा मानला जाणारा 'स्ट्रेट ऑफ होर्मुझ' (Strait of Hormuz) हा जलमार्ग बंद झाला होता, ज्यामुळे भारताला इंधन आणि गॅस टंचाईचा तीव्र सामना करावा लागला. मात्र, आता दोन्ही देशांमध्ये शांतता प्रस्थापित होण्याचे संकेत मिळत असून, भारतासाठी एक अत्यंत आनंदाची बातमी समोर आली आहे. होर्मुझ जलमार्ग अखेर पूर्णपणे खुला झाला असून, गॅस आणि कच्च्या तेलाने भरलेले टँकर्स भारताच्या दिशेने रवाना झाले आहेत.

४० एलपीजी जहाजे भारताकडे रवाना: प्राप्त माहितीनुसार, इराण-अमेरिका शांतता चर्चेनंतर होर्मुझ सामुद्रधुनीतील विस्कळीत झालेली वाहतूक पुन्हा एकदा सुरळीत होत आहे. या जलमार्गावरून एलपीजी (LPG) गॅसने भरलेली तब्बल ४० जहाजे भारताकडे येण्यासाठी निघाली आहेत. यामुळे मागील काही महिन्यांपासून देशातील कोट्यवधी कुटुंबांना भेडसावणाऱ्या गॅस पुरवठ्याच्या आणि सिलिंडरच्या समस्येत लवकरच मोठा दिलासा मिळण्याची दाट शक्यता आहे.

LPG आयातीत तब्बल ५१ टक्क्यांपर्यंत झाली होती घट: ऊर्जा क्षेत्रातील आघाडीच्या विश्लेषकांच्या मते, पश्चिम आशियातील या युद्धाचा सर्वाधिक फटका गॅस क्षेत्राला बसला होता. केपलर (Kpler) या संस्थेचे वरिष्ठ ऊर्जा विश्लेषक सुमित रितोलिया यांनी दिलेल्या माहितीनुसार, युद्धाच्या काळात भारताची एलपीजी आयात नेहमीच्या तुलनेत तब्बल ५१ टक्क्यांनी घटली होती. आयात घटल्याने देशांतर्गत गॅसचा साठा (Buffer Stock) पुन्हा भरून काढण्याचे मोठे आव्हान सरकार आणि तेल कंपन्यांसमोर उभे राहिले होते. हा पुरवठा आता टप्प्याटप्प्याने सामान्य होणार आहे.

पेट्रोल, डिझेल आणि गॅसचे दर कमी होणार? या युद्धजन्य परिस्थितीमुळे आंतरराष्ट्रीय बाजारात कच्च्या तेलाच्या (Crude Oil) किमती गगनाला भिडल्या होत्या. त्याचा थेट परिणाम म्हणून भारतातील घरगुती आणि व्यावसायिक एलपीजी सिलिंडर महागले होते, तसेच पेट्रोल-डिझेलच्या किमतींवर प्रचंड दबाव वाढून वाहतूक व उद्योग क्षेत्राचा खर्च वाढला होता.

परंतु, आता होर्मुझ सामुद्रधुनी पुन्हा सुरू झाल्यामुळे तेल आणि गॅसचा जागतिक पुरवठा स्थिर होईल. तज्ज्ञांच्या मते, पुरवठा सुरळीत राहिल्यास आगामी काळात देशात पेट्रोल, डिझेलच्या किमती कमी होऊ शकतात आणि घरगुती गॅस सिलिंडर देखील स्वस्त होऊन सर्वसामान्यांना मोठा आर्थिक दिलासा मिळू शकतो.