पुणे: प्रशासनाच्या गलथान कारभाराविरोधात अनोखे मुंडन आंदोलन; खड्ड्यात बसून सामाजिक कार्यकर्त्याचा तीव्र रोष, राजगुरुनगर-खरपुडी मार्गावरील प्रकार

पुणे: खेड तालुक्यात प्रशासनाच्या विरोधात नागरिकांचा आणि सामाजिक कार्यकर्त्यांचा संताप अनावर झाल्याची एक अत्यंत लक्षवेधी घटना समोर आली आहे. राजगुरुनगर ते खरपुडी या अत्यंत वर्दळीच्या मार्गावर पडलेल्या जीवघेण्या खड्ड्यांकडे आणि रस्त्याच्या दुर्दशेमुळे होत असलेल्या हालखातींकडे सार्वजनिक बांधकाम विभागाचे सातत्याने दुर्लक्ष होत असल्याचा आरोप करत, एका सामाजिक कार्यकर्त्यांने चक्क रस्त्यावरील खड्ड्यात बसून अनोखे 'मुंडन आंदोलन' केले आहे.

मिळालेल्या सविस्तर माहितीनुसार, राजगुरुनगर ते खरपुडी तसेच होलेवाडी ते खरपुडी यादरम्यानचा सुमारे सात किलोमीटर लांबीचा रस्ता पूर्णपणे उखडला असून रस्त्यावर मोठे आणि धोकादायक खड्डे पडले आहेत. हा मार्ग नेहमी अत्यंत वर्दळीचा असल्याने या मार्गावरून प्रवास करणाऱ्या शाळकरी मुले, महिला, कामगार वर्ग आणि वाहनचालकांना नाहक त्रास सहन करावा लागत आहे. खड्ड्यांमुळे झालेल्या दुरवस्थेमुळे येथे सतत लहान-मोठे अपघात होत असून जीवितहानीचा धोका निर्माण झाला आहे.

या रस्त्याची तातडीने दुरुस्ती करण्यात यावी, यासाठी स्थानिक नागरिकांनी व सामाजिक कार्यकर्त्यांनी यापूर्वी अनेकदा संबंधित सार्वजनिक बांधकाम विभागाला लेखी निवेदने दिली होती. मात्र, प्रशासनाकडून या गंभीर समस्येकडे सातत्याने दुर्लक्ष केले जात असल्यामुळे आणि कोणतीही ठोस कारवाई होत नसल्यामुळे नागरिकांमध्ये तीव्र संताप उसळला. अखेर प्रशासनाला गाढ झोपेतून जागे करण्यासाठी सामाजिक कार्यकर्ते तथा प्रसिद्ध निवेदक लक्ष्मण औताडे यांनी खरपुडी (ता. खेड) येथे रस्त्यावरील मोठ्या खड्ड्यात बसून स्वतःचे मुंडन करून घेतले आणि या अनोख्या आंदोलनाच्या माध्यमातून प्रशासनाचा निषेध नोंदवला.

या अनोख्या आंदोलनामुळे राज्यभरात खळबळ उडाली असून, जर प्रशासनाने यावर तातडीने कोणतीही कार्यवाही केली नाही आणि रस्ता दुरुस्त केला नाही, तर यापेक्षाही तीव्र स्वरूपाचे जनआंदोलन उभारण्यात येईल, असा इशारा स्थानिक ग्रामस्थांनी दिला आहे. या आंदोलनामुळे प्रशासकीय वर्तुळात चांगलीच धावपळ उडाली असून संबंधित विभागाच्या कार्यपद्धतीवर प्रश्नचिन्ह उपस्थित केले जात आहे.