कर्नाटकात राजकीय पेच! मुख्यमंत्री सिद्धरामय्या दुपारी ३ वाजता देणार राजीनामा, पण राज्यपालच राज्यात नसल्याने नवा पेच!

कर्नाटकातील राजकीय वातावरण सध्या कमालीचे तापले असून, काँग्रेसने नेतृत्वात बदल करण्याचा निर्णय घेतल्यानंतर मुख्यमंत्री सिद्धरामय्या यांनी आपल्या पदाचा राजीनामा देण्याची घोषणा केली आहे. ठरल्याप्रमाणे, सिद्धरामय्या आज दुपारी ३ वाजता आपला अधिकृत राजीनामा सादर करणार आहेत.

मात्र, या महत्त्वाच्या घडामोडीच्या वेळी एक मोठा तांत्रिक आणि राजकीय पेच निर्माण झाला आहे. राज्याचे राज्यपाल थावरचंद गहलोत हे कौटुंबिक कारणास्तव बुधवारी रात्रीच अचानक राज्याबाहेर गेले आहेत. राज्यपाल राज्यात हजर नसल्यामुळे मुख्यमंत्री राजीनामा कोणाकडे सोपवणार आणि तो कोण मंजूर करणार, हा मोठा प्रश्न निर्माण झाला आहे.

या अनपेक्षित परिस्थितीमुळे पुढील राजकीय प्रक्रिया, विशेषतः नव्या मुख्यमंत्र्यांचा शपथविधी आणि सत्तास्थापनेचा मार्ग काहीसा धूसर झाला आहे. लोकभवनाकडून मिळालेल्या माहितीनुसार, मुख्यमंत्री सिद्धरामय्या यांनी अद्याप राज्यपालांच्या भेटीची वेळ मागितलेली नाही. या घडामोडींमुळे कर्नाटकाच्या राजकीय वर्तुळात उलटसुलट चर्चांना उधाण आले असून, प्रशासकीय पातळीवरही चिंतेचे वातावरण निर्माण झाले आहे.