दलाल स्ट्रीटचा कुख्यात घोटाळेबाज केतन पारेख पुन्हा सक्रिय! 'बॉस' आणि 'जॅक' नावाने चालवला ६६ कोटींचा नवा फ्रंट-रर्निंग घोटाळा!

मुंबई: सन २००१ मधील ऐतिहासिक शेअर बाजार घोटाळ्याचा मुख्य सूत्रधार आणि दलाल स्ट्रीटचा 'पाईड पायपर' म्हणून ओळखला जाणारा केतन विनायचंद्र पारेख पुन्हा एकदा मोठ्या आर्थिक फसवणुकीच्या प्रकरणात अडकला आहे. बाजार नियंत्रक संस्थेने एका मोठ्या फ्रंट-रर्निंग (Front-Running) घोटाळ्याचा पर्दाफाश केला असून, यामध्ये केतन पारेखचे नाव पुन्हा एकदा समोर आले आहे. याप्रकरणी अंतरिम आदेश जारी करत पारेख आणि त्याच्या टोळीशी संबंधित तब्बल ६५.७७ कोटी रुपयांची अवैध कमाई जप्त करण्याचे आदेश देण्यात आले आहेत.

असा उघड झाला घोटाळा:
मुंबई आणि कोलकाता येथील सुमारे २० वेगवेगळ्या ठिकाणांवर ३० महिने मोठी शोधमोहीम राबवून या आंतरराष्ट्रीय रॅकेटचा छडा लावण्यात आला. तपासादरम्यान असे आढळून आले की, सिंगापूरमधील एका मोठ्या व्यापाऱ्याकडे अमेरिकेतील एका मोठ्या फंड हाऊसच्या (FPI) आगामी व्यवहारांची अत्यंत गोपनीय व बिगर-सार्वजनिक माहिती असायची. ही माहिती तो गुपचूप केतन पारेखला पुरवायचा. या माहितीच्या आधारे केतन पारेख बाजारात मोठी खरेदी-विक्री करून कोट्यवधींचा नफा कमावत होता.

'बॉस' आणि 'जॅक' नावाने चालवला खेळ:
मार्केटमधून आधीच १४ वर्षांसाठी बंदी घालण्यात आलेला ६२ वर्षांचा केतन पारेख स्वतःचे नाव लपवून पूर्णपणे पडद्यामागून सूत्रे हलवत होता. तो 'बॉस', 'जॅक', 'जॅक न्यू' आणि 'जॅक लेटेस्ट न्यू' अशा बनावट नावांचा वापर करून व्हॉट्सॲप चॅट्स आणि कॉल्सद्वारे कोलकातामधील आपल्या फ्रंट-रनर्सना थेट सूचना द्यायचा. पकडले जाऊ नये म्हणून त्याने बनावट नावांवर घेतलेले तब्बल १० पेक्षा जास्त मोबाईल नंबर्स आणि सिम कार्ड्स वापरले होते. पैशांच्या देवाणभेवाणीसाठी त्याने 'अंगडिया' (पारंपरिक कुरिअर नेटवर्क) चा वापर केला होता.

बड्या गुंतवणूकदारांना मोठा फटका:
या संपूर्ण गैरव्यवहारात ब्रोकरेज फर्म्स आणि कोलकातामधील काही कंपन्यांनी मिळून जवळपास ३८.७ कोटी रुपयांचा अवैध नफा कमावला, तर मुख्य गुप्त माहिती पुरवणाऱ्या भागीदाराला २७.०७ कोटी रुपयांची दलाली मिळाली. या प्रकरणात केतन पारेखसह २२ संस्था व व्यक्तींना तात्काळ प्रभावाने शेअर बाजारात कोणत्याही प्रकारचा व्यापार करण्यास किंवा बाजारातील मध्यस्थांशी जोडले जाण्यास पूर्णपणे बंदी घातली आहे. वारंवार बंदी आणूनही डिजिटल युगातील पळवाटांचा शोध घेऊन यंत्रणेला चकवा देण्याच्या पारेखच्या या नवीन कृत्यामुळे गुंतवणूकदारांमध्ये तीव्र संताप व्यक्त होत आहे.