भारताची 'स्लीपर वंदे भारत' जगात सर्वात स्वस्त! चीन, अमेरिका आणि जपानमधील हायस्पीड ट्रेनचे तिकीट दर ऐकून थक्क व्हाल

नवी दिल्ली: भारतीय रेल्वेच्या इतिहासात क्रांती घडवून आणणारी आणि प्रवाशांना विमानासारख्या अत्याधुनिक सुविधा देणारी 'स्लीपर वंदे भारत' (Vande Bharat Sleeper) एक्सप्रेस लवकरच रुळावर धावण्यासाठी सज्ज झाली आहे. मध्यंतरी रेल्वे मंत्रालयाने संसदेत जाहीर केलेल्या आकडेवारीनुसार, भारताची ही सेमी-हायस्पीड रेल्वे सेवा जगातील इतर प्रगत देशांच्या तुलनेत अत्यंत स्वस्त आणि किफायतशीर आहे. चीन, अमेरिका, युरोप आणि जपान या देशांमधील हायस्पीड गाड्यांचे तिकीट दर पाहिले, तर भारतीय रेल्वे किती कमी खर्चात जागतिक दर्जाचा प्रवास देत आहे, हे स्पष्ट होते.

जागतिक पातळीवर तिकीट दरांची तुलना (प्रति किलोमीटर खर्च):

भारत (वंदे भारत): भारतात वंदे भारत एक्सप्रेसचा प्रति किलोमीटर प्रवासाचा खर्च अंदाजे ₹२.१९ इतका येतो. स्लीपर वंदे भारतचे किमान भाडे ४०० किलोमीटरसाठी ९६० रुपयांपासून (3AC) सुरू होते.

चीन: चीनमधील हायस्पीड ट्रेनने प्रवास करण्यासाठी प्रति किलोमीटर ₹७ ते ₹१२ खर्च येतो. म्हणजेच तेथे १,००० किलोमीटर प्रवासासाठी तब्बल ₹७,००० ते ₹१२,००० मोजावे लागतात.

युरोप आणि फ्रान्स: युरोपीय देशांमध्ये हायस्पीड रेल्वेचा प्रवास आणखी महाग आहे. तेथे प्रति किलोमीटर चा खर्च ₹१० ते ₹१८ आहे. १,००० किलोमीटर अंतरासाठी प्रवाशांना ₹१०,००० ते ₹१८,००० खर्च करावे लागतात.

जपान (शिनकानसेन बुलेट ट्रेन): तंत्रज्ञानात आघाडीवर असलेल्या जपानमध्ये हायस्पीड ट्रेनचे तिकीट दर प्रति किलोमीटर ₹१२ ते ₹२० दरम्यान आहेत. म्हणजेच १,००० किलोमीटर प्रवासासाठी अंदाजे ₹१२,००० ते ₹२०,००० मोजावे लागतात.

अमेरिका: अमेरिकेत हायस्पीड रेल्वे कनेक्टिव्हिटी मर्यादित असली, तरी तेथील सरासरी तिकीट दर प्रति किलोमीटर ₹१५ ते ₹३० पर्यंत पोहोचतात. म्हणजेच १,००० किलोमीटरसाठी सुमारे ₹१५,००० ते ₹३०,००० पर्यंत अवाढव्य खर्च येतो.

स्लीपर वंदे भारतची खास वैशिष्ट्ये:
१८० किमी प्रतितास वेगाची क्षमता असलेल्या या ट्रेनमध्ये 'कन्व्हर्टेबल' आधुनिक बर्थ, बायो-व्हॅक्यूम टॉयलेट्स, कवच सुरक्षा प्रणाली आणि ध्वनी व कंपन कमी करणारे प्रगत सस्पेंशन तंत्रज्ञान वापरण्यात आले आहे. सर्वात महत्त्वाचे म्हणजे, प्रवाशांना उत्तम अनुभव देण्यासाठी या ट्रेनमध्ये कोणतीही आरएसी (RAC) किंवा वेटिंग लिस्टची सुविधा नसेल; केवळ कन्फर्म तिकीट असलेल्या प्रवाशांनाच प्रवास करता येईल.

जगातील बड्या देशांच्या तुलनेत भारताने प्रवाशांच्या खिशाचा विचार करून अत्यंत कमी दरात ही सेवा उपलब्ध करून दिल्यामुळे जागतिक स्तरावर भारतीय रेल्वेचे कौतुक होत आहे.