कुंभमेळ्याच्या निविदेत ३५ कोटींचा 'डिजिटल' डल्ला; विभागीय आयुक्तांच्या बनावट स्वाक्षरीने प्रशासनात खळबळ, 'बीटेक' पदवीधर अटकेत

नवी मुंबई: नाशिक-त्र्यंबकेश्वर सिंहस्थ कुंभमेळा २०२७ च्या पूर्वतयारीच्या नावाखाली प्रशासनाची फसवणूक करणाऱ्या एका उच्चशिक्षित भामट्याचा कारनामा उघडकीस आला आहे. विभागीय आयुक्तांची बनावट डिजिटल स्वाक्षरी करून ३५ कोटींचे टेंडर मिळवून देण्याचे आमिष दाखवणाऱ्या अभिषेक संजय झरे (२३, रा. ऐरोली) याला नवी मुंबई पोलिसांनी बेड्या ठोकल्या आहेत.

एका 'स्पेलिंग'ने फिरवली तपासाची चक्रे
अभिषेकने अत्यंत हुशारीने विभागीय आयुक्त डॉ. प्रवीण गेडाम यांच्या डिजिटल स्वाक्षरीची हुबेहूब नक्कल केली होती. २८ एप्रिल रोजी नीळकंठ शेवाळे नामक व्यक्तीने जेव्हा या पत्राची पडताळणी करण्यासाठी आयुक्तांचे कार्यालय गाठले, तेव्हा फसवणुकीचा हा प्रकार समोर आला. डॉ. गेडाम यांच्या स्वाक्षरीतील 'Praveen' या नावाऐवजी अभिषेकने 'Pravin' असे स्पेलिंग लिहिले होते. याच एका लहानशा चुकीने त्याचा ३५ कोटींचा हा डाव उधळला गेला.

सॉफ्टवेअर नाही, तर 'ॲप'चा आधार
तपासात धक्कादायक माहिती समोर आली आहे की, आरोपीने कोणत्याही महागड्या सॉफ्टवेअरचा वापर न करता केवळ मोबाईलमधील 'ScanOnO' या साध्या ॲपद्वारे ही बनावट स्वाक्षरी तयार केली होती. तांत्रिक शिक्षणाचा उपयोग विधायक कामांऐवजी फसवणुकीसाठी करत त्याने चक्क शासकीय मोहोर आणि स्वाक्षरीची हुबेहूब नक्कल करून बनावट कार्यारंभ आदेश (वर्क ऑर्डर) तयार केले होते.

कुंभमेळा आयुक्तांच्या नावेही बनावट पत्रे
अभिषेकच्या मोबाईलची तपासणी केली असता केवळ डॉ. गेडाम यांचीच नव्हे, तर कुंभमेळा आयुक्त शेखर सिंह यांच्या नावाने तयार केलेली बनावट पत्रेही पोलिसांना सापडली आहेत. कुंभमेळ्यातील 'सीसीटीव्ही सर्वेक्षण' आणि 'एआय' आधारित सुरक्षा यंत्रणेचे कंत्राट मिळवून देण्याच्या नावाखाली त्याने एका कंत्राटदाराकडे २० लाख रुपयांची मागणी केल्याचेही उघड झाले आहे.

मूळचा वर्धा येथील असलेला हा तरुण नवी मुंबईत राहून हे रॅकेट चालवत होता. या प्रकरणामागे अजून काही मोठे मासे आहेत का, याचा तपास नाशिक रोड पोलीस ठाण्याचे पोलीस निरीक्षक बडेसाब नाईकवाडे करत आहेत. या घटनेमुळे शासकीय कामकाजातील डिजिटल सुरक्षेचा मुद्दा पुन्हा एकदा ऐरणीवर आला आहे.