बलात्कार प्रकरणातील फरार आरोपीला लातूरमधून अटक; भारती विद्यापीठ पोलिसांची कारवाई

पुणे: बलात्कार करून पीडित तरुणीचे फोटो सोशल मीडियावर व्हायरल करण्याची धमकी देणाऱ्या फरार आरोपीला भारती विद्यापीठ पोलिसांनी लातूर परिसरातून बेड्या ठोकल्या आहेत. काशीराम चंद्रकांत म्हस्कले (वय २२, रा. मांगडेवाडी, कात्रज) असे अटक करण्यात आलेल्या आरोपीचे नाव आहे.

नेमकी घटना काय?
आरोपी म्हस्कले याने एका तरुणीवर बलात्कार केला होता. त्यानंतर त्याने तरुणीची छायाचित्रे समाज माध्यमांवर प्रसारित करण्याची धमकी दिली होती. याप्रकरणी पीडितेने मार्च महिन्यात भारती विद्यापीठ पोलीस ठाण्यात तक्रार दाखल केली होती. गुन्हा दाखल झाल्यापासून आरोपी म्हस्कले पोलिसांना गुंगारा देऊन फरार झाला होता.

अशी झाली अटक
आरोपीचा शोध घेण्यासाठी पोलिसांनी तांत्रिक तपास सुरू केला असता, तो लातूरमधील खरबवाडी परिसरात असल्याची माहिती पोलिसांना मिळाली. या माहितीच्या आधारे भारती विद्यापीठ पोलिसांनी लातूरमध्ये सापळा रचून त्याला अटक केली. ही कारवाई पोलीस उपायुक्त मिलिंद मोहिते आणि वरिष्ठ पोलीस निरीक्षक राहुलकुमार खिलारे यांच्या मार्गदर्शनाखाली पथकाने केली.