'प्लीज बाजूला व्हा..'; पत्नी रडत हात जोडत होती, पण ट्रॅफिकने रस्ता दिला नाही; देशासाठी लढणाऱ्या जवानाचा आळंदीत दुर्दैवी अंत

पुणे/आळंदी:
देशाच्या संरक्षणासाठी आयुष्याची २२ वर्षे सीआरपीएफ (CRPF) मध्ये सेवा देणाऱ्या एका माजी जवानाचा पुण्यात ट्रॅफिक कोंडीमुळे अत्यंत दुर्दैवी मृत्यू झाला आहे. हृदयविकाराचा झटका आल्यानंतर रुग्णालयात पोहोचण्यासाठी झालेला केवळ १० मिनिटांचा विलंब त्यांच्या जीवावर बेतला. भिमाजी तुकाराम चौरे (वय ५९) असे या जवानाचे नाव आहे.

नेमकी काय घडली घटना?
आळंदीतील जगन्नाथ पार्क परिसरात राहणाऱ्या भिमाजी चौरे यांना रविवारी राहत्या घरी हृदयविकाराचा तीव्र झटका आला. घरापासून केवळ १ किलोमीटर अंतरावर हॉस्पिटल होते. रस्ता रिकामा असता तर ५ ते १० मिनिटांत ते हॉस्पिटलला पोहोचले असते. मात्र, आळंदीतील पद्मावती रोडवर मंगल कार्यालयांच्या गर्दीमुळे आणि बेशिस्त पार्किंगमुळे वाहनांच्या लांबच लांब रांगा लागल्या होत्या.

हृदयद्रावक दृश्य:
रस्ता पूर्णपणे जाम असल्याने चौरेंची पत्नी आणि मुलगी रिक्षाच्या पुढे धावत जाऊन वाहनचालकांना हात जोडून बाजूला होण्याची विनवणी करत होत्या. "प्लीज रस्ता द्या, माझ्या पतीचा जीव वाचवा," अशा आर्त हाका त्या मारत होत्या. मात्र, बेशिस्तपणे उभ्या असलेल्या गाड्यांमुळे त्यांना रस्ता मिळू शकला नाही. अखेर १० मिनिटांच्या अंतरासाठी २० ते २५ मिनिटे लागली आणि रुग्णालयात पोहोचेपर्यंत चौरेंची प्राणज्योत मालवली.

प्रशासनाविरुद्ध संताप:
आळंदीतील मंगल कार्यालयांच्या बेशिस्त पार्किंगमुळे वारंवार होणाऱ्या ट्रॅफिक कोंडीचा फटका एका जवानाला बसल्याने आळंदीकरांमध्ये तीव्र संताप आहे. आपत्कालीन स्थितीत रुग्णवाहिकेला किंवा रुग्णाला रस्ता न मिळणे हे व्यवस्थेचे मोठे अपयश असल्याचे बोलले जात आहे. ज्या जवानाने देशासाठी आयुष्य वेचले, त्याला ट्रॅफिकमुळे जीव गमवावा लागल्याने सोशल मीडियावरही हळहळ व्यक्त होत आहे.