Pune : लग्नात ५५ तोळे सोनं आणि फॉर्च्युनर; अतिरिक्त १०० तोळ्यांसाठी छळ, पुण्यात शिवसेना नेत्याच्या सुनेवर गंभीर आरोप, कोर्टाने फटकारलं

Pune : ‘आरोपींचे सत्ताधारी शिवसेनेशी संबंध असल्याचे दिसत आहे. त्यामुळे आरोपी राजकीयदृष्ट्या प्रभावशाली असल्याने सत्र न्यायालयाने १५ डिसेंबर २०२५ रोजी अटकपूर्व जामीन अर्ज फेटाळल्यानंतरही अद्याप त्यांना अटक झालेली नाही’, असे गंभीर निरीक्षण मुंबई उच्च न्यायालयाने पुण्यातील हुंडा छळवणुकीच्या प्रकरणात बुधवारी नोंदवले. त्याचबरोबर आरोपींचा अटकपूर्व जामीन अर्जही न्यायालयाने स्पष्टपणे फेटाळून लावला.

शिवसेनेचे (एकनाथ शिंदे गट) खेड येथील नेते अनिल लोखंडे, त्यांच्या पत्नी सुवर्णा, मुलगा आदित्य व मुलगी समृद्धी यांनी अटकेपासून संरक्षण मिळण्यासाठी अर्ज केला होता. आदित्यच्या पत्नीने या कुटुंबाविरोधात हुंड्यासाठी शारीरिक व मानसिक छळवणूक केल्याचा आणि पिस्तुल दाखवून धमकावल्याचा आरोप केला आहे.

Pune : स्वीकृतपद फिल्डिंगसाठी पुण्यात गर्दी; चंद्रकांतदादा आणि मोहोळांकडे लक्ष, मुरली अण्णा ठाम, निवडणुकीत काय ठरेल?

‘ऑगस्ट-२०२३ मध्ये आदित्यसोबत झालेल्या विवाह सोहळ्याच्या वेळी माझ्या वडिलांनी दोन कोटी रुपये खर्च केले. त्यात ५५ तोळे सोने, दोन किलो चांदी, फॉर्च्युनर कार व इलेक्ट्रॉनिक वस्तू दिल्या. मात्र, आदित्यला शेअर बाजारात खूप नुकसान झाल्याने सासरच्यांनी पुन्हा शंभर तोळे सोने व लक्झरी कार माहेरून आणण्याची मागणी केली. ती मान्य होत नसल्याचे पाहून सासरच्यांनी माझा अनन्वित छळ केला. केस धरून मारहाण, तव्यावर हात ठेवून भाजणे, असे अनेक प्रकार केले. सासऱ्यांनी पिस्तुल दाखवून धमकावले. अखेर माझा जीव धोक्यात असल्याचे कळल्यानंतर मला माहेरच्यांनी घरी नेले’, असे फिर्यादी महिलेने एफआयआरमध्ये नमूद केले आहे.

वाढदिवसाला सोन्याच्या कड्याचा हट्ट
लग्नानंतर काही दिवसांनी पती आदित्यचा वाढदिवस आला. या निमित्ताने सासरच्या मंडळींनी माहेरून आणखी पैसे आणि दागिने आणण्यासाठी विवाहितेचा छळ सुरु केल्याचा आरोप आहे. वाढदिवसाला सोन्याचे कडे हवे म्हणून आदित्यने हट्ट धरला. मुलीचा त्रास कमी व्हावा म्हणून वडिलांनी पुन्हा ४ तोळ्याचे सोन्याचे कडे, २५ हजारांचे घड्याळ आणि वाढदिवसाच्या खर्चासाठी ३५ हजार रुपये रोकड दिल्याची माहिती आहे. मात्र तरी देखील 'आणखी पैसे घेऊन ये' असे म्हणत सासरच्यांनी तिचा शारीरिक आणि मानसिक छळ सुरूच ठेवल्याचा दावा केला जात आहे.