Mumbai : श्री सिद्धिविनायक मंदिरात आजपासून 'माघी गणेश जयंती महोत्सवा'ची सुरुवात; गायन, वादन, शोभायात्रांसह आठवडाभर भव्य सोहळा

Mumbai : प्रभादेवी येथील श्री सिद्धिविनायक गणपती मंदिरात 22 जानेवारीला होणाऱ्या माघी गणेश जयंतीनिमित्त माघ श्री गणेश जयंती महोत्सवाचं आयोजन केलं आहे. आज, सोमवारपासूनच या महोत्सवाला सुरूवात होणार आहे. 19 जानेवारी ते रविवार, 25जानेवारीपर्यंत विविध धार्मिक व सांस्कृतिक कार्यक्रमांचे आयोजन करण्यात आले आहे. देशभरातील नामवंत कलाकार या महोत्सवात सहभागी होणार आहेत.

या महोत्सवादरम्यान, श्री सिद्धिविनायक मंदिरात दररोज पहाटे सकाळी 5.00 ते 5.30 दरम्यान काकड आरतीने धार्मिक कार्यक्रमांची सुरुवात होईल. त्यानंतर दिवसभर महानैवेद्य, नमस्कार, अभिषेक तसेच अन्य विधी पार पडतील. सायंकाळी लोकनृत्य, भजन, शास्त्रीय गायन, शास्त्रीय नृत्य आणि वाद्यसंगीत अशा विविध सांस्कृतिक व धार्मिक कार्यक्रमांचे आयोजन करण्यात आले आहे.

Pune : वर्दीचं स्वप्न अपूर्णच! पोलीस भरतीसाठी पुण्यात आलेल्या तरुणाने मित्राच्या खोलीत उचललं टोकाचं पाऊल; शहरात खळबळ

विविध कलाकारांचे सादरीकरण
सोमवारी सायंकाळी प्रसिद्ध तालवादक आणि पद्मश्री पुरस्कार विजेते शिवमणी यांचे सादरीकरण होणार आहे. मंगळवारी बासरीवादनाचे ज्येष्ठ कलाकार पंडित राकेश चौरसिया यांची बासरी मैफल होईल. त्याच संध्याकाळी ओडिसी नृत्यप्रकाराचे सादरीकरणही होणार आहे. बुधवारी प्रसिद्ध सतारवादक पंडित निलाद्री कुमार यांचा सतारवादनाचा कार्यक्रम आयोजित करण्यात आला आहे. तसेच रघुनाथ फडके यांचे गीत रामायण सादरीकरणही होणार आहे.

22 तारखेला भव्य रथ शोभयात्रा
22 जानेवारीला मुख्य माघी गणेशोत्सवाचा सोहळा पार पडणार आहे. यासाठी त्या दिवशी दुपारी 3.00 वाजता भव्य रथ शोभायात्रा काढण्यात येणार आहे. यावेळी भाविकांची कोणतीही गैरसोय होऊ नये यासाठी ज्येष्ठ नागरिकांसाठी वेगळ्या रांगेची व्यवस्था करण्यात आली आहे.
शुक्रवारी, 23 जानेवारी रोजी पद्मश्री पुरस्कार विजेते विजय घाटे यांचे तबलावादन होईल. तर शनिवारी, 24 जानेवारी रोजी प्रसिद्ध तबलावादक पंडित आदित्य कल्याणकर यांचा तबलावादनाचा कार्यक्रम होणार आहे.

मंदिर प्रशासनाच्या मते, आठवडाभर चालणाऱ्या या उत्सवाचे उद्दिष्ट भारतीय सांस्कृतिक परंपरा भक्तीने जिवंत ठेवणे आहे. माघी गणेश जयंतीला, श्री सिद्धिविनायक मंदिर पुन्हा एकदा भक्ती, संगीत आणि संस्कृतीचे केंद्र बनेल.