Pune : मोदी–फडणवीसांच्या पक्षावर ७० हजार कोटींचा आरोप; अजितदादा–चव्हाण आमनेसामने!”

Pune : पिंपरी-चिंचवड महापालिकेत भाजपनं भ्रष्टाचार केल्याचा आरोप उपमुख्यमंत्री अजित पवार यांनी केला होता. ज्यांनी माझ्यावर ७० हजार कोटी रुपयांच्या भ्रष्टाचाराचे आरोप केले, त्या सगळ्यांसोबत मी आज सरकारमध्ये बसलोय ना, असा युक्तिवादही अजित पवारांनी केला. या विधानाचे पडसाद आता उमटू लागले आहेत. अजित पवार यांनी सर्वप्रथम स्वत:च्या पक्षाकडे पाहायला हवं. ते नरेंद्र मोदी आणि देवेंद्र फडणवीस यांच्या नेतृत्त्वातील पक्षाबद्दल बोलत आहेत, हे त्यांनी लक्षात ठेवावं. आम्ही कधी आरोप करायला गेलो, तर त्यांना फार अडचणी निर्माण होतील, असा इशारा भाजपचे प्रदेशाध्यक्ष रविंद्र चव्हाण यांनी दिला. ते पुण्यातील पत्रकार परिषदेत बोलत होते.

पुणे आणि पिंपरी-चिंचवड महापालिकेत भाजप विरुद्ध राष्ट्रवादी काँग्रेस असा थेट सामना आहे. आजी, माजी सत्ताधारी एकमेकांसमोर भिडले आहेत. एकमेकांवर आरोप सुरु आहेत. परस्परांवरील आरोपांमुळे सगळेच उघडे पडू लागले आहेत, असं चित्र निर्माण झालं आहे. भ्रष्टाचाराच्या मुद्द्यावर बोलताना अजित पवार यांनी काल झालेल्या पत्रकार परिषदेत सिंचन घोटाळ्याचा विषय काढला. ७० हजार कोटी रुपयांच्या घोटाळ्याचा दाखला अजित पवारांनी दिला. ज्यांनी ७० हजार कोटी रुपयांच्या भ्रष्टाचाराचे आरोप केले, त्यांच्याच सोबत आज मी सत्तेत बसलो ना, असा सवाल अजित पवारांनी केला. हा प्रश्न विचारुन उपमुख्यमंत्र्यांनी थेट भाजपची कोंडी केली.

Railway Expansion : राज्यातील ४८ रेल्वे स्थानकांचा कायापालट होणार! पुणे, नाशिक, कोल्हापूर, बीडकरांना होणार फायदा; रेल्वे मंत्र्यांची घोषणा

पिंपरी-चिंचवड महानगरपालिकेतील सत्ताधाऱ्यांसाठी सध्या कुठे भ्रष्टाचार करुन पैसा कमावता येईल, हेच लक्ष्य आहे. आशिया खंडातील सर्वात श्रीमंत महानगरपालिका असणारी पिंपरी-चिंचवड महानगरपालिका कशाप्रकारे कर्जाच्या खाईत लोटली गेली, हे तुम्ही पाहिलं असेल. महापालिकेच्या ८ हजार कोटी रुपयांच्या ठेवी सत्ताधाऱ्यांनी मोडल्या. त्या मोडून काय कामं केली, कामं केली असतील तर ती दाखवावीत, असं आव्हान अजित पवारांनी दिलं.

भाजपवर तुटून पडलेल्या अजित पवारांना भाजपचे प्रदेशाध्यक्ष रविंद्र चव्हाण यांनी उत्तर दिलं आहे. आम्ही आरोप करायला गेलो, तर त्यांना फार अडचणी निर्माण होतील. याची काळजी त्यांनी घ्यायला हवी, असं रविंद्र चव्हाण म्हणाले. आरोप-प्रत्यारोप कसे करावेत हे त्यांनी ठरवलं पाहिजे. अजित पवारांनी आधी स्वत:कडे पाहावं आणि ते मोदी, फडणवीसांच्या पक्षाविषयी बोलत आहेत, हे लक्षात ठेवावं, असा सूचक इशारा चव्हाण यांनी दिला.