Pune : ‘तू जीन्स का घातली?’ तीन वर्षांपूर्वी पतीचे निधन; विधवा महिलेने जीन्स घातल्याने दीर-सासूकडून छळ, पुण्यात धक्कादायक प्रकार उघड

Pune : जीन्स घातल्याच्या रागातून एका ३३ वर्षीय महिलेला सासू, दीर, आणि मुलीने बेदम मारहाण केल्याची धक्कादायक घटना सहकारनगर भागात घडली. या मारहाणीत महिलेचा हात मोडल्याने तिला गंभीर अवस्थेत ससून रुग्णालयात दाखल करण्यात आले आहे. पीडितेच्या तक्रारीवरून सहकारनगर पोलिस ठाण्यात गुन्हा दाखल करण्यात आला आहे.

पोलिसांनी सांगितले, की तक्रारदार कचरावेचक असून, त्या चार मुलांसह तळजाई वसाहत परिसरात राहतात. त्यांच्या पतीचे तीन वर्षांपूर्वी निधन झाले. त्या ३० डिसेंबरला सायंकाळी साडेसहाच्या सुमारास घराबाहेर जीन्स घालून थांबल्या होत्या. त्या वेळी त्यांची सासू सविता तेथे आली आणि जीन्स घातल्याच्या रागातून सुनेचे केस ओढून मारहाण केली. तिच्या चारित्र्यावरही संशय घेतला.

Jalna : जालन्यात भीषण अपघात, काही मिनिटांतच दोन्ही वाहने आगीत खाक; धडकी भरवणारा CCTV फुटेज समोर

पीडितेने आरडाओरडा केल्यानंतर त्यांची मोठी मुलगी घटनास्थळी आली. मात्र, तिनेही आईला मारहाण केली. पीडितेच्या दिराने तिचा डावा हात पिरगळला. या मारहाणीत महिलेचे मनगटाजवळील हाड मोडले. पीडितेच्या मुलांनाही धक्काबुक्की करण्यात आली. आरोपींनी महिलेचा मोबाइलही काढून घेतला. या प्रकरणी सहकारनगर पोलिसांनी मारहाण, शिवीगाळ आणि गंभीर दुखापत केल्याप्रकरणी गुन्हा दाखल केला आहे. पोलिसांनी संबंधित महिलेला ससून रुग्णालयात नेऊन तिची वैद्यकीय तपासणी केली असता मनगटाचे हाड फॅक्चर झाल्याचे आढळले.

या घटनेनंतर परिसरात संताप व्यक्त केला जात असून, महिलांच्या वैयक्तिक स्वातंत्र्यावर होणाऱ्या हिंसाचाराचा हा गंभीर प्रकार असल्याची प्रतिक्रिया नागरिकांनी दिली आहे. पोलिसांकडून आरोपी सासू, दीर आणि मुलीविरोधात भारतीय न्याय संहितेअंतर्गत संबंधित कलमे लावण्यात आली असून पुढील तपास सुरू आहे. पीडित महिलेच्या सुरक्षिततेसाठी पोलिसांनी आवश्यक ती खबरदारी घेतली आहे. तसेच, मुलांच्या संरक्षणाच्या दृष्टीने बालकल्याण समितीला याबाबत माहिती देण्यात येणार असल्याचे सूत्रांनी सांगितले. आरोपींची चौकशी सुरू असून लवकरच अटक होण्याची शक्यता पोलिसांनी व्यक्त केली आहे.