Pune : रिंग रोड प्रकल्पाला पुन्हा विलंब; 44 गावांतून जाणार पुण्याचा वर्तुळाकार रस्ता

Pune : पुणे महानगर प्रदेश विकास प्राधिकरण अर्थात पीएमआरडीएला आता वर्तुळाकार रस्ता, रिंग रोड प्रकल्पासाठी काही अडचणी येत आहेत. या प्रकल्पासाठी संरक्षण विभागाची जमीन अद्याप ताब्यात येणं बाकी आहे. त्यामुळे पहिल्या टप्प्यातील सोलू ते वडगाव शिंदे या जागेची निविदा काढण्यात अडचण येत आहे. त्यामुळे आता आणखी काही काळ नगर रस्त्यावरून दररोज ये-जा करणाऱ्या नागरिकांना वाहतूक कोंडीचा त्रास सहन करावा लागणार आहे. 'पीएमआरडीए'च्या रिंग रोडचं ग्रहण सुटत नसल्याचं चित्र आहे.

बाहेरून येणारी अवजड वाहनं पुणे शहरात येऊ नयेत, तसंच पुणे आणि पिंपरी-चिंचवड शहरातील वाहतूक कोंडी कमी व्हावी यासाठी रिंग रोड महत्त्वाचा आहे. महत्त्वाची बाब म्हणजे १९९७ मध्ये हा रस्ता पुणे जिल्हा प्रादेशिक योजनेत प्रस्तावित करण्यात आला. मात्र, आजपर्यंत तो मार्गी लागलेला नाही. पहिल्या टप्प्यात सोलू, निरगुडे ते वडगाव शिंदे अशा पाच किमीच्या रस्त्याचं काम हाती घेतलं आहे. पण यासाठी भूसंपादन प्रस्ताव 'पीएमआरडीए' ने जिल्हाधिकारी कार्यालयाला पाठवला होता. त्यानुसार वन आणि संरक्षण विभाग वगळून इतर जागा ताब्यात आली आहे.

Vashi Fire : नवी मुंबईत उंच इमारतीत भीषण आग; चिमुकलीसह चौघांचा मृत्यू, कारण ऐकून थरकाप उडेल

पहिला टप्प्यातील 23 हेक्टर जागा सोलू ते वडगाव शिंदे दरम्यान असून ती वन आणि संरक्षण विभागाची आहे. त्यापैकी वन विभागाची जागा मिळण्याबाबत राज्य सरकारकडे प्रस्ताव पाठवण्यात आला आहे. त्यानुसार जागा 'पीएमआरडीए'ला मिळेल. मात्र संरक्षण विभागाची जागा ताब्यात नसल्याने निविदा काढण्याबाबत अद्याप निर्णय झालेला नाही, अशी माहिती पीएमआरडीए, महानगर आयुक्त, डॉ. योगेश म्हसे यांनी दिली आहे.

'पीएमआरडीए'ने अर्थसंकल्पात 145 कोटी 75 लाख रुपयांची तरतूद या रस्त्यासाठी केली आहे. 65 मीटर रुंद आणि 128 किमी लांबीचा हा रस्ता आहे. सोलू ते निरगुडे आणि निरगुडे ते वडगाव शिंदे असे दोन भाग करण्यात आले आहेत. सोलू ते वडगाव शिंदे या 4.7 किमी लांबीच्या पहिल्या टप्प्याचं काम सुरू आहे. या पहिल्या टप्प्यामुळे रस्त्यावरील वाहतूक कोंडी कमी होण्यास मदत होणार आहे. मावळ तालुक्यातील परंदवडी ते खेड तालुक्यातील सोलू असा ४० किमीचा हा रस्ता महाराष्ट्र राज्य रस्ते विकास महामंडळ (एमएसआरडीसी) विकसित करणार आहे. या रस्त्याला राज्य सरकारकडून सर्व मान्यता प्राप्त झाल्या आहेत.

- हा रिंग रोड, रस्ता एकूण 44 गावांतून जाणार आहे
- खेडमधील 1, हवेली 27, मुळशी 10 आणि मावळमधील 6 गावांचा या रस्त्यात समावेश
- प्रकल्पासाठी 743.41 हेक्टर जागा आवश्यक
- एकूण 128 किलोमीटर लांबीचा रस्ता असून, त्यापैकी सुमारे 83 किलोमीटर लांबीचं काम 'पीएमआरडीए' करेल, ४० किमीचं काम 'एमएसआरडीसी', तर ५.७० किमीचं काम महापालिका करणार आहे.