मराठी भाषा गौरव दिन विशेष:तरुण गुप्तहेराने दिली बनावट नोटांची बातमी…., ‘ग्राफिक्स’आडच्या बनावट नाेटांचा काळा धंदा मालेगाव ते संभाजीनगर

मराठी भाषेला अनेक दिग्गज मराठी लेखकांनी वैभव प्राप्त करून दिले. त्यांनी लेखणीतून निर्माण केलेल्या काही विलक्षण व्यक्तिरेखांचे गारूड आजही मराठी मनावर आहे. या व्यक्तिरेखांनी आजच्या ताज्या बातम्यांचे रिपोर्टिंग कसे केले असते, अशी मांडणी मराठी भाषा गौरव दिनानिमित्त दिव्य मराठीच्या या प्रयोगात केली आहे. साहसी, धाडसी फास्टर फेणे म्हणजे भा. रा. भागवतांनी किशोरवयीन मुलांसाठी लिहिलेली अफलातून व्यक्तिरेखा. तर हा फास्टर फेणे सांगतोय बनावट नोटांच्या टोळीबद्दल. “बाप रे! काय सॉलिड केस होती ही! बन्याबापू कान देऊन ऐका. सायकल काढली आणि थेट गेलो मालेगावच्या सटाणा रोडवर. तिथल्या एचडीएफसी बँकेत फायनान्स एजंट बिचारा गणेश खरे, हा 23 जानेवारीला 78 हजार भरण्यास गेला अन‌् पाचशेच्या 100 नोटा ‘बोगस’ निघाल्या. टिंग टिंग टिंगाक! पोलिसांनी नोटा जप्त केल्या आणि खरेला ताब्यात घेतलं. भयंकरच सगळं. धागेदोरे थेट संभाजीनगरच्या जयभवानीनगरमध्ये. येथील ‘विनायक ग्राफिक्स’ मध्ये हा पठ्ठ्या 500 च्या नोटा छापायचा. आधीच तार प्रिंट केलेला खास 85 जीएसएमचा पेपर तो ऑनलाइन मागवायचा. पोलिसांनी छापा टाकताच मुख्य सूत्रधार संतोष केळसकरला 200 बनावट नोटांसह पकडला. डेंजर एकदम... खरेकडून अजय राठोड, रायबान मोरेंची नावे पुढे आली. त्यांनी करण राठोडचं नाव, त्याने बन्सीलाल यादव, त्याने कन्नडच्या रेहान खान, समीर शेखची नावे घेतली. त्यांनीही गोल्डन कुरेशी, अजिंक्य जाधव अन‌् शुभम खैरनारकडे बोट दाखवले. शुभमने केळसकरचे नाव घेतले अन‌् रॅकेटचा पर्दाफाश झाला.