उल्हासनगर: दिवाळीत डबल डेकर मेट्रोची भेट; मेट्रो ५ आणि ५ अ च्या निविदा जाहीर होताच शिंदेंच्या शिवसैनिकांकडून पेढे वाटून जोरदार जल्लोष!

उल्हासनगर: ठाणे-भिवंडी-कल्याण मेट्रो मार्गिका ५ चा विस्तार आता थेट उल्हासनगरपर्यंत करण्यात आला असून, एमएमआरडीएने (MMRDA) या प्रकल्पाच्या आगामी टप्प्यांसाठी तब्बल ४ हजार ५६४ कोटी रुपयांच्या निविदा प्रसिद्ध केल्या आहेत. या महत्त्वपूर्ण घोषणेमुळे उल्हासनगर, कल्याण आणि भिवंडी परिसरातील नागरिकांसाठी दिवाळीच्या सणात विकासाची मोठी भेट मिळाली आहे. या आनंदाच्या निमित्ताने शिंदेंच्या शिवसेना कार्यकर्त्यांनी शहरात एकत्र येत पेढे वाटून जोरदार आनंदोत्सव साजरा केला आणि फटाके फोडून जल्लोष केला.

मेट्रो मार्गिका ५ आणि ५ अ चे वैशिष्ट्य व डबल डेकर मार्ग

ठाणे ते भिवंडी आणि कल्याण असा प्रवास सुकर करणाऱ्या मेट्रो मार्गिका ५ च्या पहिल्या टप्प्यात कापूरबावडी ते धामणकर नाका या मार्गिकेचे काम आधीच प्रगतीपथावर आहे. आता या प्रकल्पाच्या पुढील विस्तारामध्ये धामणकर नाका ते रांजणोली आणि रांजणोली ते भोईरवाडी (व्हाया दुर्गाडी मार्गे) या टप्प्यांचा समावेश करण्यात आला आहे. भिवंडीमधील अरुंद आणि गर्दीचे रस्ते लक्षात घेता, धामणकर नाका ते टेमघर हा मार्ग भुयारी पद्धतीने (Underground) उभारला जाणार असून उर्वरित मार्ग उन्नत (Elevated) असेल.

विशेष म्हणजे, रांजणोली जंक्शन ते दुर्गाडी आणि जगदीश दूध डेपो परिसरापासून उल्हासनगरपर्यंत मेट्रो मार्गिकेसोबत उड्डाणपुलाची एकत्रित रचना असलेला 'डबल डेकर' (Double-Decker) मार्ग उभारण्याचे आधुनिक नियोजन करण्यात आले आहे. या प्रकल्पांतर्गत मेट्रो ५ अ मध्ये भोईरवाडी ते कल्याण स्थानक आणि भोईरवाडी ते उल्हासनगर (जीएनपी गॅलक्सी) अशा विस्तारित भागाची उभारणी केली जाणार आहे. या सर्व कामांसाठी एमएमआरडीएकडून अधिकृत निविदा जाहीर करण्यात आल्या आहेत.

नागरिकांचा प्रवास होणार अतिजलद व सुकर

खासदार डॉ. श्रीकांत शिंदे यांच्या पाठपुराव्यामुळे या मेट्रो मार्गिकेच्या विस्ताराला आणि सुधारित आराखड्याला राज्य शासनाची व एमएमआरडीएची मान्यता मिळाली आहे. या प्रकल्पामुळे ठाणे, भिवंडी, कल्याण आणि उल्हासनगर हे सर्व परिसर थेट एका मजबूत मेट्रो जाळ्याने जोडले जाणार आहेत. रस्ते वाहतुकीवरील ताण कमी होऊन प्रवाशांचा प्रवास अतिशय वेगवान, सुरक्षित आणि आरामदायक होणार आहे. या ऐतिहासिक निर्णयामुळे उल्हासनगरमधील नागरिकांमध्ये आणि व्यापारी वर्गात अत्यंत उत्साहाचे वातावरण पाहायला मिळत आहे.