नाशिक: भोंदू अशोक खरातच्या जामीन अर्जावर आज महत्त्वाची सुनावणी; ज्येष्ठ विधिज्ञ उज्ज्वल निकम सरकार पक्षातर्फे मांडणार बाजू

नाशिक: भविष्य पाहण्यासाठी आलेल्या महिलांवरील लैंगिक अत्याचार तसेच आर्थिक फसवणुकीच्या गंभीर आरोपांप्रकरणी अटकेत असलेल्या भोंदू अशोक खरात याच्या जामीन अर्जावर सोमवारी (दि. ३१) जिल्हा व सत्र न्यायालयात महत्त्वापूर्ण सुनावणी होणार आहे. या खटल्यात विशेष सरकारी वकील वकील उज्ज्वल निकम पहिल्यांदाच सरकार पक्षाची बाजू मांडणार असल्याने या सुनावणीकडे विशेष लक्ष लागले आहे. यासाठी वकील निकम रविवारी रात्री नाशिकमध्ये दाखल झाल्याची माहिती अधिकृत सूत्रांनी दिली.

अशोक खरात प्रकरणाने राज्यभरात खळबळ उडाली होती. या खटल्यासाठी सरकारने वकील निकम यांची विशेष सरकारी तकील म्हणून जून महिन्यात नियुक्ती केली होती. मात्र त्यांच्याकडे राज्यातील इतर महत्त्वाच्या खटल्यांची जबाबदारी असल्याने अशोक खरात प्रकरणात ते पहिल्यांदाच सरकारची बाजू न्यायालयात मांडण्यासाठी नाशिकमध्ये आले आहेत.

तपास यंत्रणेकडून पुरावे व साक्षीदारांची माहितीही संकलित करण्यात आली आहे. खरात प्रकरणात नियमित सुनावणी सुरू झाली आहे. सरकार पक्षाकडून या प्रकरणातील आरोपांचे गांभीर्य, तपासाची सद्यस्थिती तसेच उपलब्ध पुराव्यांच्या आधारे जामीन अर्जाला विरोध केला जाण्याची शक्यता आहे. विशेष सरकारी वकील म्हणून वकील उज्ज्वल निकम स्वतः सरकार पक्षाची बाजू मांडणार असल्याने या खटल्यातील सुनावणीला अधिक महत्त्व प्राप्त झाले आहे.
सोमवारच्या सुनावणीत दोन्ही बाजूंचा युक्तिवाद ऐकल्यानंतर न्यायालय जामीन अर्जाबाबत काय निर्णय घेते,याकडे पीडितांसह नाशिककरांचे लक्ष लागले आहे. नाशिक शहर, नाशिक ग्रामीण आणि अहिल्यानगर जिल्ह्यात मिळून अशोक खरात विरोधात एकूण १७ गुन्हे दाखल आहेत. त्यापैकी १२ गुन्ह्यांचा तपास विशेष
तपास पथकाकडे (एसआयटी) आहे