पुण्यात मन सुन्न करणारी घटना! खेळायला गेलेल्या ७ वर्षीय चिमुरड्याचा लिफ्टमध्ये अडकून दुर्दैवी मृत्यू!

पुणे: पुण्यातील सिंहगड रस्ता परिसरातून एक अत्यंत धक्कादायक, मन सुन्न करणारी आणि पालकांचे डोळे उघडणारी दुर्दैवी घटना समोर आली आहे. येथील निम्बजनगर भागातील एका निवासी सोसायटीच्या लिफ्टमध्ये तांत्रिक बिघाड झाल्यामुळे एका ७ वर्षीय निष्पाप बालकाचा अडकून मृत्यू झाला आहे. शिवांश शैलेश धूत (वय ७) असे या दुर्दैवी चिमुरड्याचे नाव आहे. लिफ्टमध्ये हवा खेळती न राहिल्यामुळे आणि प्रचंड घाबरल्यामुळे शिवांशचा गुदमरून अंत झाल्याचे प्राथमिक तपासात समोर आले आहे. खेळता खेळता लिफ्टमध्ये गेला अन्...मिळालेल्या माहितीनुसार, निम्बजनगर येथील 'रिद्धी-सिद्धी अपार्टमेंट'मध्ये राहणारा शिवांश नेहमीप्रमाणे रात्रीच्या वेळी सोसायटीच्या आवारात खेळण्यासाठी खाली गेला होता.

खेळत असताना तो अचानक एकटाच इमारतीच्या लिफ्टमध्ये शिरला आणि त्याने वरच्या मजल्याचे बटण दाबले. मात्र, ही चार मजली इमारत असून, दुसरा मजला येण्यापूर्वीच लिफ्ट अचानक दोन मजल्यांच्या मध्यभागी (स्लॅबजवळ) अडकली. शिवांश बराच वेळ घरी न परतल्यामुळे त्याच्या पालकांनी आणि बहिणीने सोसायटीच्या आवारात त्याची शोधाशोध सुरू केली. तो कुठेच सापडत नसल्याने कुटुंबाची काळजी वाढली. शोध घेत असताना, इमारतीची लिफ्ट बंद असल्याचे आणि ती मध्यभागी अडकल्याचे रहिवाशांच्या लक्षात आले. लिफ्टच्या दाराच्या फटीतून पाहिले असता शिवांश आत बेशुद्ध अवस्थेत पडलेला दिसला.

अग्निशमन दल धावले, पण खूप उशीर झाला होताघटनेचे गांभीर्य ओळखून रहिवाशांनी तातडीने रात्री ११:३० च्या सुमारास सिंहगड रस्ता पोलीस आणि अग्निशमन दलाला (Fire Brigade) याची माहिती दिली. अग्निशमन दलाचे जवान आणि पोलीस पथक घटनास्थळी दाखल झाले. जवानांनी कटर आणि इतर साहित्याचा वापर करून शर्थीचे प्रयत्न करत लिफ्टचे कोलॅप्सिबल लोखंडी दार आणि लाकडी दरवाजा तोडून शिवांशला बाहेर काढले. त्याला तातडीने जवळच्या रुग्णालयात नेण्यात आले, परंतु उपचारापूर्वीच डॉक्टरांनी त्याला मृत घोषित केले. जवळपास दीड तास तो लिफ्टमध्ये अडकल्यामुळे त्याचा श्वास गुदमरला होता.

सोसायटीच्या देखभालीवर प्रश्नचिन्ह; पोलिसांकडून तपास सुरूवरिष्ठ पोलीस निरीक्षक विनय पाटणकर यांनी दिलेल्या माहितीनुसार, सिंहगड रस्ता पोलिसांनी या प्रकरणी अकस्मात मृत्यूची (ADR) नोंद केली आहे. प्राथमिक तपासणीत लिफ्टमध्ये कोणताही मोठा तांत्रिक बिघाड दिसून आला नसला, तरी सुमारे २५ वर्षे जुन्या असलेल्या या लिफ्टचे नियमित 'सेफ्टी ऑडिट' आणि वार्षिक देखभाल (AMC) केली जात होती का, याची तपासणी पोलीस करत आहेत.या हृदयद्रावक घटनेमुळे संपूर्ण सिंहगड रस्ता परिसरात शोककळा पसरली असून, लहान मुलांना लिफ्टमध्ये एकटे न पाठवण्याचे आणि सोसायट्यांनी लिफ्ट सुरक्षेचे नियम कडक पाळण्याचे आवाहन प्रशासनाकडून करण्यात आले आहे.