Women’s Asia Cup : भारतीय संघाची जेतेपदाला गवसणी, अंतिम फेरीत बांगलादेशचा उडवला धुव्वा

वुमन्स आशिया कप स्पर्धेच्या अंतिम सामन्यात भारताने बांगलादेशला 46 धावांनी पराभूत केलं. या सामन्यात नाणेफेकीचा कौल हा भारताचे बाजूने लागला होता. कर्णधार राधा यादवने क्षणाचाही विलंब न करता प्रथम फलंदाजी करण्याचा निर्णय घेतला. भारताने 20 षटकात 7 गडी गमवून 134 धावा केल्या. तसेच विजयासाठी 135 धावांचं आव्हान दिलं. पण या धावांचा पाठलाग करताना बांगलादेशचा संघ 19.1 षटकात 88 धावा करू शकला. भारताने 46 धावांनी विजय मिळवत जेतेपद खिशात घातलं आहे. या विजयासह एसीसी महिला आशिया कप रायझिंग स्टार्सचे जेतेपद कायम ठेवले.या सामन्यात भारताची सुरूवात फार काही चांगली झाली नाही. अवघ्या 44 धावांवर चार गडी तंबूत होते. पण मधल्या फळीत तेजल हसबनीस आणि राधा यादव यांनी डाव सावरला. पाचव्या विकेटसाठी या दोघांनी 69 धावांची भागादारी केली. या भागीदारीमुळे भारताला 134 धावांपर्यंत मजल मारता आली. तेजल हसबनीसने फलंदाजीत उत्कृष्ट कामगिरी केली. तिने 34 चेंडूत 51 धावा केल्या. यात तीन चौकार आणि दोन षटकारांचा समावेश होता.

भारताने विजयासाठी दिलेल्या 135 धावा करताना बांगलादेशचा डाव पत्त्यासारखा कोसळला. एकही फलंदाज 20च्या पुढे धावा करू शकला नाही. सहा फलंदाजांचा डाव तर एकेरी धावसंख्येवरच आटोपला. विकेटकीपर शमिमा सुल्तानाने सर्वाधिक 20 धावांची खेळी केली. इशमा तनजीम 3, समिन सुल्ताना 18, सादिया अक्तर 10, लता मोंडल 1, फहिमा खातुन 14, फरजाना इस्मिन 6, शोरिफा खातुन 9, संजिदा अक्तर मेघला 5, फतेमा जहान सोनिया 1 अशा धावा करून बाद झाले. भारताकडून प्रेमा रावतने 4 षटकात 12 धावा देत 3 गडी बाद केले. तर सोनिया मेंदियाने 2, तनुजा कंवरने 2. साईमा ठाकोरने 1, मिन्नू रावतने 1 आणि राधा यादवने 1 विकेट काढली.

दोन्ही संघांची प्लेइंग 11

बांगलादेश अ महिला (प्लेइंग इलेव्हन): इश्मा तंजीम, शमिमा सुलताना (विकेटकीपर), सरमीन सुलताना, फहिमा खातुन (कर्णधार), लता मोंडल, फरजाना इसमिन, शोरिफा खातुन, सादिया अक्टर, फातेमा जहाँ सोनिया, संजिदा अक्तर मेघला, फरीहा त्रिस्ना.

भारत अ महिला (प्लेइंग इलेव्हन): नंदिनी कश्यप, वृंदा दिनेश, तेजल हसबनीस, अनुष्का शर्मा, राधा यादव (कर्णदार), ममथा माडीवाला (डब्ल्यू), मिन्नू मणी, तनुजा कंवर, सोनिया मेंदिया, प्रेमा रावत, साइमा ठाकोर