Pune : पुणे विद्यापीठात ‘डिलिव्हरी बॉय’चे विचित्र वर्तन; परदेशी विद्यार्थिनीची तक्रार, शहरात संताप

Pune : सावित्रीबाई फुले पुणे विद्यापीठातील परदेशी विद्यार्थिनींच्या वसतिगृहात एका ‘डिलिव्हरी बॉय’कडून विद्यार्थिनींसमोर अश्लील वर्तन केल्याची धक्कादायक घटना उघडकीस आली आहे. या घटनेमुळे विद्यापीठातील सुरक्षेचा प्रश्न पुन्हा एकदा ऐरणीवर आला आहे. शुक्रवारी रात्री घडलेल्या या प्रकाराची माहिती शनिवारी अधिसभेत समोर आली.

तक्रार न करण्यासाठी दबाव

संबंधित विद्यार्थिनींनी कुलगुरू डॉ. सुरेश गोसावी यांच्याशी संवाद साधताना, पोलिसांत तक्रार दाखल न करण्यासाठी पुणे विद्यापीठातील व्यक्तींनी आपल्यावर दबाव टाकल्याचे सांगितले. या प्रकारावरून सदस्य राहुल पाखरे, कृष्णा भंडलकर, सचिन गोरडे पाटील, ईशानी जोशी, अपर्णा लळिंगकर, अद्वैत बंबोली, शंतनू लामधाडे आदींनी आक्रमक पवित्रा घेऊन प्रशासनाला धारेवर धरले. विद्यापीठाच्या सुरक्षा व्यवस्थेवर तीव्र टीका केली. आंतरराष्ट्रीय केंद्राचे संचालक डॉ. विजय खरे यांच्या निलंबनाची मागणीही करण्यात आली.

विद्यापीठात विविध अभ्यासक्रमांच्या प्रवेशासाठी येणाऱ्या परदेशी विद्यार्थ्यांसाठी वसतिगृहाची स्वतंत्र व्यवस्था आहे. यात ४५ आंतरराष्ट्रीय विद्यार्थिनी आणि ८५ आंतरराष्ट्रीय विद्यार्थी याची निवासाची सोय आहे; परंतु भारतीय सांस्कृतिक संबंध परिषद (आयसीसीआर) यांच्यासमवेत झालेल्या करारानुसार आंतरराष्ट्रीय विद्यार्थ्यांना वसतिगृह मिळाल्यानंतरच प्रवेश द्यावा आणि त्यासाठी विद्यार्थ्यांना काही अनुदान देण्यात येते. याअंतर्गत विद्यापीठात अतिरिक्त विद्यार्थ्यांना प्रवेश देण्यात आला आहे. प्राध्यापकांच्या निवासस्थानी असलेल्या इमारतीत काही परदेशी विद्यार्थिनींची राहण्याची व्यवस्था करण्यात आली आहे. या ठिकाणी सीसीटीव्ही कॅमेरे, सुरक्षारक्षक अशा कोणत्याही प्रकारची सुरक्षा व्यवस्था नसल्याची बाब अधिसभेसमोर आली.

विद्यार्थिनींच्या म्हणण्यानुसार, डिलिव्हरी बॉय ऑर्डर दिलेली वस्तू देण्यासाठी आला असताना त्याने अश्लील वर्तन केले. त्यानंतर त्यांनी तातडीने सुरक्षारक्षकांना माहिती दिली. मात्र, पोलिसांत तक्रार नोंदवू नये; म्हणून दबाव आणून लेखी निवेदन घेण्यात आल्याचा आरोप करण्यात आला आहे. या प्रकारामुळे संतप्त सदस्यांनी या प्रकरणाची गंभीर दखल घेऊन तातडीने सुरक्षा उपाययोजना करण्याचे आदेश दिले. तसंच तक्रार दाखल करण्याबाबत कुलगुरुंकडून सूचना करण्यात आली आहे.