Water Dam Level : पुणेकरांचं टेन्शन संपलं, मागील वर्षी पेक्षा चारपट अधिक पाणीसाठा, वाचा कोणत्या धरणात किती पाणी?

Water Dam Level :पुणेकरांसाठी आनंदाची बातमी समोर आली आहे. पुणेकरांची पाण्याची चिंता आता मिटणार आहे. पुणेकरांना पाणी पुरवठा करणारा खडकवासला धरणाच्या पाणी साठ्यात वाढ झाली आहे. या धरणात ४५.१३ टक्के इतका पाणीसाठा जमा झाला आहे.

ऐन मे महिन्यात सुरु झालेल्या पावसाने धुमाकूळ घातला. अवकाळी पावसाने शेतकऱ्याचे नुकसान केले. सध्या मोठ्या प्रमाणावर पडणाऱ्या पावसाने पुणेकरांच्या पाण्याची चिंता मिटवली आहे. पुणे शहराच्या पाणीपुरवठ्यासाठी महत्त्वाच्या असलेल्या खडकवासला धरण साखळीतील चारही धरणांत आज ता.२७ जून सकाळी ६ वाजेपर्यंत एकूण १३.१६ टीएमसी म्हणजे ४५.१३ टक्के इतका पाणीसाठा जमा झाला आहे. गतवर्षी याच दिवशी फक्त ३.५७ टीएमसी म्हणजे १२.२४ टक्के साठा या धरणात शिल्लक होता. मात्र यावर्षी चारपट अधिक पाणी या धरणात साठले आहे. या धरण परिसरात पावसाच्या प्रमाणात वाढ होत असून, मागील २४ तासांत चारही धरणांमध्ये मिळून ४८७ दशलक्ष घनफूट इतकी नव्या पाण्याची आवक झाली आहे.

MHADA Lottery : कल्याण-ठाण्यात हक्काच्या घराचं स्वप्न पूर्ण होणार, जुलैमध्ये ४००० घरांची लॉटरी निघणार, वाचा सविस्तर

खडकवासला धरणातून मागील गुरुवारपासून धरणातून पाणी सोडण्यास सुरुवात झाली होती.‌ धरणातून या आठ दिवसात मुठा नदीत २.४३ टीएमसी पाणी सोडण्यात आले आहे. खडकवासला धरणाची पाण्याची पातळी १.२० टीएमसी कायम ठेवत धरणातील विसर्ग सुरू आहे. पावसाचा जोर असाच कायम राहिल्यास पुणेकरांच्या वर्षभराच्या पाण्याची चिंता दूर होणार आहे. जून महिन्यात पाणीसाठ्यात झालेली लक्षणीय वाढ पाहता त्या पार्श्वभूमीवर धरण परिसरात पडणारा पाऊस आणि त्यामुळे धरणात जमा होणारे पाण्यावर लक्ष ठेऊन विसर्ग करण्यात येणार आहे.

पुण्यातील धरणांमध्ये किती टक्के पाणी साठा आहे ?

महाराष्ट्रात १ जून पासून पडलेला पाऊस बघता पुण्यातील धरणांमध्ये मागील वर्षीपेक्षा यावर्षी पाणीसाठा अधिक आहे. पावसाचा जोर असाच कायम राहिला तर पुणेकरांना वर्षभर पाण्याची चिंता मिटणार आहे. पुण्यातील खडकवासला धरणामध्ये १.२३ टीएमसी म्हणजेच ६२.१७ टक्के इतका आहे. पानशेत धरणात ४.४१ टीएमसी म्हणजेच ४१.४४ टक्के इतका पाणी साठा आहे. वरसगाव धरणात ६.४० टीएमसी म्हणजेच ४९.९३ टक्के इतका आहे. तर टेमघर धरणात १.११ टीएमसी म्हणजेच ३०.०६ टक्के इतका आहे.