भंडारा-साकोली महामार्गावर काळाचा घाला! भरधाव वाहनाच्या धडकेत पायी चालणाऱ्या दोघांचा जागीच मृत्यू

भंडारा: भंडारा-साकोली राष्ट्रीय महामार्गावर रविवारी सकाळी एक भीषण अपघात घडला. महामार्गावरून पायी चालणाऱ्या दोन वृद्ध व्यक्तींना भरधाव अज्ञात वाहनाने जोरदार धडक दिली. या अपघातात दोघांचाही घटनास्थळीच दुर्दैवी मृत्यू झाला. अपघातानंतर वाहनचालक घटनास्थळावरून फरार झाला असून, पोलिसांकडून त्याचा शोध घेतला जात आहे.

ही घटना भंडारा-साकोली राष्ट्रीय महामार्गावरील धारगाव येथील पेट्रोलपंपासमोर घडली. मृतांची ओळख कुंडलिक वालदे (वय ६३) आणि भिवा बोंदले (वय ७०) अशी पटली असून, ते दोघेही धारगाव येथील रहिवासी होते.

नेमकी घटना काय?
मिळालेल्या माहितीनुसार, रविवारी सकाळी दोघेही महामार्गाच्या एका बाजूने पायी चालले होते. दरम्यान, भरधाव वेगाने आलेल्या एका अज्ञात वाहनाने त्यांना जोरदार धडक दिली. धडक इतकी भीषण होती की, दोघेही गंभीर जखमी झाले आणि त्यांचा जागीच मृत्यू झाला. अपघाताची माहिती मिळताच स्थानिक नागरिकांनी घटनास्थळी धाव घेतली आणि मदतीचा प्रयत्न केला, परंतु तोपर्यंत उशीर झाला होता.

घटनेची माहिती मिळताच कारधा पोलिसांचे पथक तात्काळ घटनास्थळी दाखल झाले. पोलिसांनी मृतदेहांचा पंचनामा करून ते शवविच्छेदनासाठी पाठवले आहेत. या अपघातानंतर वाहनचालक घटनास्थळावरून पसार झाला आहे. त्यामुळे आरोपी वाहनचालकाचा शोध घेणे हे आता पोलिसांसमोर मोठे आव्हान आहे.

कारधा पोलिस ठाण्यात अज्ञात वाहनचालकाविरोधात गुन्हा दाखल करण्यात आला असून, पुढील तपास सुरू आहे. या घटनेमुळे धारगाव परिसरात शोककळा पसरली असून, स्थानिक नागरिकांनी राष्ट्रीय महामार्गावरील निष्काळजी वाहनचालकांमुळे वाढणाऱ्या अपघातांबाबत तीव्र संताप व्यक्त केला आहे.

 

सविस्तर वाचा, लिंक कमेंट मध्ये  https://punenews24.in/