चंद्रपूर: शिकारीचा पाठलाग ठरला जीवघेणा! माकडाच्या मागे धावलेला बिबट्या थेट वीज रोहित्रावर (DP) चढला अन् विजेचा धक्का बसून जागीच मृत्यू!

चंद्रपूर: शिकारीच्या शोधात निघालेल्या मादी बिबट्याचा पाठलाग अखेर तिच्याच जीवावर बेतला. बंदराचा पाठलाग करताना विजेच्या डीपीवर चढलेल्या बिबट्याला विद्युत प्रवाहाचा जोरदार धक्का बसला आणि त्यात बिबट्यासह बंदराचाही मृत्यू झाला. चिमूर तालुक्यातील वगाडपेठ परिसरातील या अनोख्या घटनेने वन्यजीवप्रेमींमध्ये हळहळ व्यक्त होत आहे.

चिमूर वनपरिक्षेत्रातील शंकरपूर उपवनक्षेत्रांतर्गत पिंपळगाव येथील शेतकरी महादेव धारणे यांच्या शेतात ही घटना घडली. त्यांच्या शेतातील विद्युत डीपीवर रविवारी सायंकाळच्या सुमारास बंदर असल्याचे दिसून आले. त्याच्या मागावर असलेली मादी बिबट्या बंदराचा पाठलाग करीत डीपीवर चढली. मात्र, डीपीच्या संपर्कात येताच तिला विद्युत प्रवाहाचा धक्का बसला असावा. या धक्क्यात बिबट्या आणि बंदर दोघांचाही मृत्यू झाल्याचा प्राथमिक अंदाज वनविभागाने व्यक्त केला आहे.

सोमवारी सकाळी महादेव धारणे शेतात गेले असता डीपीजवळ बिबट्या आणि बंदर मृतावस्थेत दिसून आले. त्यांनी तत्काळ वनविभागाला माहिती दिली. वनपरिक्षेत्र अधिकारी किशोर देऊळकर, मानद वन्यजीव रक्षक आमोद गौरकर, वनपाल राजेंद्र मेश्राम, वनरक्षक कालिदास गायकवाड आणि वनमजूर घटनास्थळी दाखल झाले.
वनविभागाच्या पथकाने घटनास्थळाचा पंचनामा करून दोन्ही मृत प्राण्यांना पुढील कार्यवाहीसाठी खडसंगी येथील वनविभागाच्या कार्यालयात हलविले. शिकारीच्या पाठलागात बिबट्याचाच जीव गेल्याने ही घटना परिसरात चर्चेचा विषय ठरली आहे.