अजिंठ्यात एसटी बसचा थरारक अपघात! पोकलेन घेऊन जाणाऱ्या अवजड ट्रेलरला मागून जोरदार धडक, २० हून अधिक प्रवासी गंभीर जखमी पण मोठी जीवितहानी टळली

 

अजिंठा, छत्रपती संभाजीनगर: छत्रपती संभाजीनगर जिल्ह्यातील अजिंठा परिसरातुन जाणाऱ्या मार्गावर एक अत्यंत भीषण आणि थरारक अपघाताची घटना समोर आली आहे. अजिंठा येथील मुखपाठ फाट्याजवळ एसटी महामंडळाच्या बसने पोकलेन मशीन घेऊन जाणाऱ्या एका अवजड ट्रेलरला पाठीमागून अत्यंत जोरात धडक दिली. ही धडक इतकी भीषण होती की, बसचा पुढील भाग पूर्णपणे चक्काचूर झाला असून बसमधील प्रवाशांमध्ये एकच हालचाल व हाहाराकार उडाला. या अपघातात बसमधील सुमारे वीस ते पंचवीस प्रवासी जखमी झाले आहेत.

प्राप्त माहितीनुसार, या अपघातात जखमी झालेल्या प्रवाशांच्या डोक्याला, नाकाला, हाताला व पायाला गंभीर दुखापती झाल्या आहेत. घटनेची माहिती मिळताच स्थानिक नागरिकांनी आणि प्रशासनाने तात्काळ घटनास्थळी धाव घेत मदतकार्य सुरू केले. सर्व जखमी प्रवाशांना उपचारासाठी तातडीने जवळच्या रुग्णालयात दाखल करण्यात आले. सुदैवाने, या तीव्र अपघातात कोणतीही जीवितहानी झाली नसल्याची माहिती समोर आली असून, मोठी दुर्घटना टळल्याने सर्वांनी सुटकेचा श्वास सोडला आहे. प्राथमिक अंदाजानुसार चालकाचे नियंत्रण सुटल्यामुळे किंवा वाहनाच्या वेगामुळे हा अपघात घडला असावा, अशी शक्यता वर्तवली जात असून पोलीस या प्रकरणाचा अधिक तपास करत आहेत.