शिक्षकांच्या नियुक्तीवरून वाद: जिल्हाधिकारी कार्यालयात राडा करणाऱ्या गेवराई पायगाच्या सरपंचांना अटक; महिला तहसीलदारांना धमकी दिल्याचा आरोप

४ शिक्षकांना इतर कामाला लावले; संतापलेल्या सरपंचाचे जिल्हाधिकारी कार्यालयात आंदोलन, मंगेश साबळेंना अटक

छत्रपती संभाजीनगर: जिल्हा परिषद शाळेतील शिक्षकांना अशैक्षणिक कामासाठी नियुक्त केल्यामुळे विद्यार्थ्यांच्या शिक्षणावर परिणाम होत असल्याचा आरोप करत फुलंब्री तालुक्यातील गेवराई पायगा येथील सरपंच मंगेश साबळे यांनी जिल्हाधिकारी कार्यालयात आंदोलन केले. आंदोलनादरम्यान अधिकाऱ्यांशी वाद, महिला तहसीलदारांना शिवीगाळ, धमकी तसेच आत्मदहनाचा प्रयत्न केल्याचा आरोप करत पोलिसांनी त्यांच्यावर सहा गंभीर कलमांन्वये गुन्हा दाखल करून अटक केली आहे.

शिक्षकांच्या नियुक्तीवरून वाद

मिळालेल्या माहितीनुसार, गेवराई पायगा येथील जिल्हा परिषद शाळेत एकूण आठ शिक्षक कार्यरत आहेत. त्यापैकी चार शिक्षकांची एसआयआरच्या कामासाठी बीएलओ (BLO) म्हणून नियुक्ती करण्यात आली आहे. त्यामुळे विद्यार्थ्यांचे शैक्षणिक नुकसान होत असल्याचा आरोप स्थानिक ग्रामस्थ आणि सरपंच मंगेश साबळे यांनी केला.

याच पार्श्वभूमीवर बुधवारी दुपारी मंगेश साबळे हे २० ते २५ गावकऱ्यांसह जिल्हाधिकारी कार्यालयात पोहोचले आणि प्रशासनाविरोधात आंदोलन सुरू केले.

जिल्हाधिकारी कार्यालयात गोंधळ

आंदोलनादरम्यान आंदोलनकर्त्यांनी जोरदार घोषणाबाजी करत प्रशासनाचा निषेध व्यक्त केला. पोलिसांनी परिस्थिती नियंत्रणात आणण्याचा प्रयत्न केला. मात्र, कार्यालयाबाहेर आल्यानंतर सरपंच मंगेश साबळे यांनी जिल्हाधिकाऱ्यांच्या वाहनासमोर ठिय्या आंदोलन केले.

महिला तहसीलदारांना धमकीचा आरोप

पोलिसांनी दिलेल्या माहितीनुसार, आंदोलनादरम्यान मंगेश साबळे यांनी महिला तहसीलदारांना अश्लील शिवीगाळ केली. तसेच "मी आणि माझ्यासोबतचे लोक ठोकून काढू, काठीने मारू," अशी धमकी दिल्याचाही आरोप आहे.

याशिवाय जिल्हाधिकाऱ्यांविरोधातही अर्वाच्य भाषेत घोषणाबाजी करण्यात आल्याचे पोलिसांनी नमूद केले आहे.

आत्मदहनाचा प्रयत्न

पोलिसांनी ताब्यात घेण्याचा प्रयत्न करताच मंगेश साबळे यांनी विरोध करत अंगावर पेट्रोल ओतून आत्मदहन करण्याची धमकी दिल्याचा आरोप आहे. त्यामुळे घटनास्थळी काही काळ तणावाचे वातावरण निर्माण झाले.

सहा गंभीर कलमांन्वये गुन्हा

शासकीय कामात अडथळा निर्माण करणे, सरकारी अधिकाऱ्यांना धमकावणे आणि इतर संबंधित आरोपांप्रकरणी सिटी चौक पोलीस ठाण्यात मंगेश साबळे यांच्याविरुद्ध सहा गंभीर कलमांन्वये गुन्हा दाखल करण्यात आला आहे.

पोलीस निरीक्षक निर्मला परदेशी यांनी दिलेल्या माहितीनुसार, मंगेश साबळे यांना रात्री उशिरा अटक करण्यात आली असून त्यांना न्यायालयात हजर करण्यात येणार आहे. या प्रकरणाचा पुढील तपास पोलीस उपनिरीक्षक गणेश केदार करत आहेत.