तिवसा तहसील कार्यालयात खळबळ! १५०० रुपयांची लाच स्वीकारताना महसूल सहाय्यक रंगेहाथ अटकेत

अमरावती: जिल्ह्यातील तिवसा तहसील कार्यालयात लाचलुचपत प्रतिबंधक विभागाने (ACB) धडाकेबाज कारवाई केली आहे.
एका महसूल सहाय्यकाला १५०० रुपयांची लाच स्वीकारताना रंगेहाथ पकडण्यात आले. या कारवाईमुळे महसूल विभागात मोठी खळबळ उडाली आहे.

नेमका प्रकार काय?मिळालेल्या माहितीनुसार, ४३ वर्षीय राहुल शंकरराव निस्वादे हे तिवसा तहसील कार्यालयात महसूल सहाय्यक म्हणून कार्यरत आहेत. एका प्रतिबंधात्मक कारवाईच्या प्रकरणात तक्रारदाराला वारंवार तारखा देऊन त्यांचे काम अडवून धरले जात होते. हे प्रकरण लवकरात लवकर संपवण्यासाठी आणि काम मार्गी लावण्यासाठी निस्वादे यांनी तक्रारदाराकडे १५०० रुपयांच्या लाचेची मागणी केली होती. एसीबीचा सापळा:वारंवार होणाऱ्या त्रासाला कंटाळून तक्रारदाराने अमरावती येथील लाचलुचपत प्रतिबंधक विभागाकडे धाव घेऊन रीतसर तक्रार नोंदवली.
तक्रारीची पडताळणी केल्यानंतर, एसीबीच्या पथकाने सोमवारी तिवसा तहसील कार्यालय परिसरात सापळा रचला. लाचेची रक्कम स्वीकारताच दबा धरून बसलेल्या अधिकाऱ्यांनी राहुल निस्वादे यांना रंगेहाथ ताब्यात घेतले.

कायदेशीर कारवाई:आरोपी निस्वादे यांच्याविरुद्ध लाचलुचपत प्रतिबंधक कायद्याच्या कलमान्वये गुन्हा दाखल करण्याची प्रक्रिया सुरू करण्यात आली आहे. शासकीय कार्यालयात होणाऱ्या भ्रष्टाचाराला आळा घालण्यासाठी एसीबीने ही मोठी कारवाई केली असून, "कोणीही लाचेची मागणी केल्यास त्वरित संपर्क साधावा," असे
आवाहन प्रशासनाकडून करण्यात आले आहे.