सावधान! तुम्ही लिंबू सरबत पिताय की हळूहळू चढणारे विष? चंद्रपुरात 'लिंबू सत्त्वा'चा सर्रास वापर

चंद्रपूरमध्ये उन्हाचा पारा ४५ अंशांवर; थंडाव्यासाठी लिंबू सरबत पिताना 'हे' नक्की तपासा चंद्रपूर: विदर्भात उन्हाळ्याचा तडाखा वाढला असून चंद्रपूरचा पारा ४५ अंशांवर पोहोचला आहे. घामाच्या धारांनी अंगाची लाहीलाही होत असताना नागरिक गारव्यासाठी रस्त्यावरील लिंबू सरबताच्या गाड्यांकडे धाव घेत आहेत. मात्र, तुम्ही पित असलेले सरबत खऱ्या लिंबाचे आहे की घातक 'लिंबू सत्त्वा'चे (सायट्रिक ॲसिड), हे तपासणे गरजेचे आहे. अनेक विक्रेते अधिक नफ्यासाठी लिंबाच्या रसाऐवजी स्वस्त पडणाऱ्या लिंबू सत्त्वाचा वापर करत असल्याची धक्कादायक माहिती समोर आली आहे.

आरोग्यावर होणारे घातक परिणाम:आयुर्वेदाचार्य डॉ. राजीव धानोरकर यांच्या मते, नैसर्गिक लिंबू हे 'अमृत' समान आहे, परंतु रासायनिक प्रक्रियेतून बनवलेले लिंबू सत्त्व हे शरीरासाठी एक प्रकारचे 'हळूहळू चढणारे विष' आहे. पोषक तत्वांचा अभाव: लिंबू सत्त्वामध्ये कोणतेही जीवनसत्त्व किंवा पोषक तत्त्वे नसतात.

पित्ताचा प्रकोप: याच्या अतिसेवनाने शरीरातील पित्त वाढते, ज्यामुळे रक्तातील उष्णता वाढून त्वचेचे विकार उद्भवू शकतात. पचनसंस्थेला धोका: विशेषतः लहान मुले आणि ज्येष्ठांच्या पचनसंस्थेवर याचे अत्यंत घातक परिणाम होतात. दातांचे नुकसान: रासायनिक लिंबू पाण्यामुळे दातांच्या वरचा थर (Inamel) डॅमेज होऊ शकतो.

कसे ओळखावे बनावट सरबत?व्यावसायिक केवळ आंबट चव आणि कमी खर्च यामुळे याला पसंती देत आहेत. जर सरबत पिऊन घसा खवखवत असेल किंवा पोटात जळजळ होत असेल, तर त्यात लिंबू सत्त्वाचा वापर असण्याची शक्यता अधिक असते. नागरिकांनी जिभेच्या चवीपेक्षा आरोग्याला महत्त्व देऊन नैसर्गिक फळांच्या रसालाच पसंती द्यावी,
असा सल्ला तज्ज्ञांनी दिला आहे.