काहीही कारण सांगू नका! मतमोजणीचे व्हिडिओ रेकॉर्डिंग न देणाऱ्या निवडणूक आयोगाला सुप्रीम कोर्टाचे खडे बोल

नवी दिल्ली: कर्नाटक राज्यातील २०२३ मधील शृंगेरी विधानसभा मतदारसंघाच्या मतमोजणीचे व्हिडिओ रेकॉर्डिंग उपलब्ध नसल्याचे सांगणाऱ्या निवडणूक आयोगाला (ECI) सर्वोच्च न्यायालयाने (Supreme Court) तीव्र शब्दांत फटकारले आहे. निवडणूक घेणाऱ्या सर्वोच्च आणि जबाबदार संस्थेच स्वतःशी संबंधित महत्त्वाचा निवडणूक रेकॉर्ड उपलब्ध नसणे हे अत्यंत गंभीर आणि अजिबात मान्य करण्यासारखे नाही, असे न्यायालयाने स्पष्ट केले आहे.

कर्नाटकातील शृंगेरी विधानसभा मतदारसंघाच्या २०२३ मधील निवडणुकीच्या मतमोजणी प्रक्रियेतील व्हिडिओ रेकॉर्डिंगच्या संदर्भात सर्वोच्च न्यायालयात एक याचिका दाखल करण्यात आली होती. या सुनावणीदरम्यान जेव्हा निवडणूक आयोगाकडून रेकॉर्ड उपलब्ध नसल्याबाबत स्पष्टीकरण देण्याचा प्रयत्न झाला, तेव्हा न्यायालयाने त्यावर तीव्र नाराजी व्यक्त केली.

न्यायालयाने निवडणूक आयोगाला सक्त शब्दांत बजावले की, या प्रकरणात कोणतेही ऐकून घेण्यासारखे कारण चालणार नाही. आगामी सुनावणीपूर्वी तात्काळ संबंधित व्हिडिओ रेकॉर्डिंग न्यायालयात सादर करावे अन्यथा निवडणूक आयोगाच्या या भूमिकेविरुद्ध कायदेशीर निष्कर्ष काढला जाईल, असा इशाराही सर्वोच्च न्यायालयाने दिला आहे. लोकशाही प्रक्रियेतील पारदर्शकता आणि उत्तरदायित्व या मुद्द्यांवर न्यायालयाने दिलेला हा आदेश अत्यंत महत्त्वपूर्ण मानला जात आहे.