मुंबई: 'गणपती बाप्पा मोरया'चा जयघोष आणि ढोल-ताशांच्या गजरात मुंबईत बाप्पाचे आगमन; सार्वजनिक गणेशोत्सवाची लगबग सुरू

मुंबई: 'गणपती बाप्पा मोरया'चा जयघोष, ढोल-ताशांचा गजर आणि फटाक्यांची आतषबाजी अशा अत्यंत उत्साही आणि भक्तीमय वातावरणात मुंबईत सार्वजनिक गणेशोत्सवाची लगबग जोरात सुरू झाली आहे. परळ, लालबाग व करी रोड येथील प्रसिद्ध कारखान्यांमधून शनिवार व रविवारी विविध गणेश मंडळांच्या भव्य मूर्ती मोठ्या वाहनांमधून आदरभावाने मंडपाकडे रवाना होत आहेत.

या आगमन मिरवणुकांमध्ये तरुण-तरुणींनी विविध प्रकारच्या वेशभूषा परिधान करून मिरवणुकीचा उत्साह आणि रंगत आणखी वाढवली आहे. बाप्पाच्या आगमनाचे हे विलोभनीय क्षण डोळ्यात साठवण्यासाठी आणि गणरायाचे दर्शन घेण्यासाठी रस्त्यांच्या दुतर्फा नागरिकांची प्रचंड गर्दी उसळली होती. तसेच, प्रसिद्ध मूर्तिकारांनी साकारलेल्या विविध आकार आणि उंचीच्या आकर्षक मूर्ती पाहण्यासाठी आणि बाप्पाच्या आगमनाचे छायाचित्र टिपण्यासाठी यूट्यूबर, फोटोग्राफर व सोशल मीडिया कंटेंट क्रिएटर्सचीही मोठी गर्दी पाहायला मिळाली.

मुंबईचा महाराजा, परळचा सम्राट, अखिल चंदनवाडी, परळचा लंबोदर, काळाचौकीचा महाराजा, आणि विक्रोळीचा एकदंत यांसारख्या प्रमुख मंडळांच्या मूर्ती परळ, लालबाग व करी रोडमधील कारखान्यांतून मोठ्या दिमाखात मंडपाकडे नेण्यात आल्या. या आगमन मिरवणुकांमुळे मुंबईच्या वाहतूक व्यवस्थेतही काही बदल करण्यात आले आहेत. परळ, लालबाग, चिंचपोकळी आणि करी रोड परिसरातील काही रस्ते मिरवणुकीमुळे वाहतुकीसाठी बंद करण्यात आले होते. वाहनचालकांना वाहतूककोंडीचा सामना करावा लागू नये म्हणून वाहतूक पोलिसांनी तात्काळ मार्गांत बदल करून वाहतूक शिवडी, राणीबाग आणि भायखळा मार्गे वळविली आहे.