Shocking Negligence at KDMC Hospital: Cardboard Used Instead of Plaster

मुंबई: कल्याण-डोंबिवली महानगरपालिकेच्या अंतर्गत येणाऱ्या रुक्मिणीबाई रुग्णालयात पुन्हा एकदा प्रशासनाचा भोंगळ कारभार चव्हाट्यावर आला आहे. एका रुग्णाच्या फ्रॅक्चर झालेल्या पायाला प्लास्टर करण्याऐवजी चक्क पुठ्ठ्याचा (Cardboard) आधार दिल्याची धक्कादायक घटना समोर आली आहे. या प्रकारामुळे रुग्णालयातील आरोग्य सुविधांच्या दुरवस्थेवर मोठा प्रश्नचिन्ह निर्माण झाले आहे.

मिळालेल्या माहितीनुसार, कल्याण पश्चिमेत राहणारे राम सोनी यांचा पाय गुरुवारी फ्रॅक्चर झाला होता. त्यांना उपचारासाठी त्यांचा मुलगा अजय याने तातडीने रुक्मिणीबाई रुग्णालयात दाखल केले. डॉक्टरांनी एक्स-रे केल्यानंतर पायाला फ्रॅक्चर असल्याचे निष्पन्न झाले. मात्र, यानंतर रुग्णालयातील कर्मचाऱ्यांनी रुग्णाच्या नातेवाईकांना प्लास्टर उपलब्ध नसल्याचे सांगून गोंधळात टाकले. त्यानंतर प्लास्टर बाहेरून आणण्यासाठी ८०० रुपये लागतील, पण जर मला ४०० रुपये दिले तर मी हे काम करून देतो, अशी थेट लाच मागितल्याचा गंभीर आरोप रुग्णाच्या मुलाने केला आहे.

या अनागोंदी कारभारामुळे संतप्त झालेल्या सोनी कुटुंबीयांनी मनसेचे नगरसेवक गणेश लांडगे आणि कपिल पवार यांच्याशी संपर्क साधला. माहिती मिळताच मनसेच्या पदाधिकाऱ्यांनी तात्काळ रुग्णालयात धाव घेऊन प्रशासनाला जाब विचारला. या प्रकारामुळे मनसे कार्यकर्त्यांनी तीव्र संताप व्यक्त केला आहे.

केडीएमसीच्या आरोग्य विभागाच्या मुख्य वैद्यकीय अधिकारी डॉ. दीपा शुक्ल यांनी यावर प्रतिक्रिया देताना सांगितले की, "रुक्मिणीबाई रुग्णालयात प्लास्टरचा साठा उपलब्ध आहे. तरीही ही घटना नेमकी कशी घडली आणि कर्मचाऱ्यांनी असे कृत्य का केले, याची सखोल चौकशी केली जाईल."

रुक्मिणीबाई रुग्णालय वादाच्या भोवऱ्यात सापडण्याची ही पहिलीच वेळ नाही. यापूर्वीही एका मुलाच्या शरीरात इंजेक्शनची सुई तुटून अडकल्याची घटना, रुग्णवाहिका वेळेत न मिळाल्याने महिलेचा झालेला मृत्यू, एका रुग्णाच्या गोळीत तांब्याची तार आढळणे आणि प्रसूतीसाठी वेळेत दाखल करून न घेतल्यामुळे रुग्णालयाच्या दारात झालेली प्रसूती अशा अनेक धक्कादायक घटनांमुळे या रुग्णालयाचा कारभार वारंवार वादात सापडला आहे. वारंवार घडणाऱ्या या गंभीर चुकांमुळे केडीएमसी प्रशासनाच्या कार्यक्षमतेवर नागरिकांकडून तीव्र नाराजी व्यक्त केली जात आहे.