Satara Accident News : पुणे-बंगळुरू महामार्गावर भीषण अपघात; भरधाव ट्रकची ट्रॅक्टरला धडक, दोघांचा जागीच मृत्यू

Satara Accident News : सातारा जिल्ह्यातून भीषण अपघाताची घटना समोर आली आहे. पुणे-बंगळुरू महामार्गावर सोमवारी रात्रीच्या सुमारास ट्रक आणि ऊसाची वाहतूक करणाऱ्या ट्रॅक्टरमध्ये भीषण अपघात झाला आहे. या अपघातात ट्रॅक्टरमध्ये बसलेल्या महिलेसह एका पुरुषाचा जागीच मृत्यू झाला. तर ट्रकमधील एक जण जखमी झाला आहे

अपघाताची माहिती मिळताच स्थानिकांसह पोलिसांनी घटनास्थळी धाव घेतली. जखमीला उपचारासाठी रुग्णालयात दाखल करण्यात आलं आहे. अपघातातील मृतांची नावे समजू शकली नाही. याप्रकरणी रात्री उशीरापर्यंत गुन्हा दाखल करण्याचे काम सुरू होते.

मिळालेल्या माहितीनुसार, अपघातग्रस्त ट्रक भरधाव वेगात पुण्याच्या दिशेने येत होता. या ट्रकने रात्रीच्या सुमारास लिंबेगावजवळ ऊस वाहतूक करणाऱ्या ट्रॅक्टरला जोरदार धडक दिली. ही धडक इतकी भीषण होती, की यामध्ये ट्रॅक्टरवर बसलेली महिला आणि पुरुष खाली पडले.

काही कळण्याचा आतच त्यांच्या अंगावरून ट्रॉलीचे टायर गेले. या घटनेत पुरुषाचा जागीच मृत्यू झाला. तर महिला गंभीर जखमी झाली. तिला तातडीने उपचारासाठी रुग्णालयात दाखल केलं असता, डॉक्टरांनी मृत घोषित केलं. अपघातात ट्रकमधील एकजण देखील जखमी झाला असून त्याच्यावर उपचार सुरू आहेत.