नागपुर: एसीबीची मोठी कारवाई; खुर्सापार चेक पोस्टवर ५०० रुपयांची लाच घेताना आरटीओ निरीक्षकासह दोघे अटकेत!

नागपुर: लाचलुचपत प्रतिबंधक विभागाला मिळालेल्या तक्रारीनुसार, नागपूरमधील खुर्सापार तपासणी नाक्यावर आरटीओ निरीक्षक साजन शेंडे हे प्रवीण नावाच्या व्यक्तीमार्फत प्रत्येक ट्रकचालकाकडून ५०० रुपयांची लाच घेत होते.

सापळा आणि अटक: तक्रारीची पडताळणी केल्यानंतर, एसीबीच्या पथकाने गुरुवारी खुर्सापार तपासणी नाक्यावर सापळा रचला. यावेळी तक्रारदार ट्रकचालकाकडून प्रवीणने शेंडे यांच्यासाठी ५०० रुपयांची लाच स्वीकारली, त्यानंतर पथकाने प्रवीण आणि आरटीओ निरीक्षक साजन शेंडे या दोघांनाही अटक केली.

अधिकारी पथक: ही कारवाई अपर अधीक्षक माधुरी बाविस्कर, विजय माहुलकर यांच्या मार्गदर्शनाखाली उपअधीक्षक भारती गुरनुले, निरीक्षक मयूर चौरसिया, राजकिरण येवले आणि त्यांच्या पथकाने केली.

विशेष संदर्भ: धक्कादायक बाब म्हणजे, साजन शेंडे यांनी ३० मार्च रोजी लाचलुचपत प्रतिबंधक विभागाच्या अधीक्षकांना एक निवेदन दिले होते. यामध्ये त्यांनी आरटीओतील काही अधिकारी आणि निवृत्त अधिकारी संगनमत करून खोट्या तक्रारीद्वारे प्रामाणिक अधिकाऱ्यांना एसीबीच्या जाळ्यात अडकवत असल्याचा
आरोप केला होता. याच निवेदनात १३ व्या क्रमांकावर साजन शेंडे यांची स्वाक्षरी होती, मात्र आता ते स्वतःच लाचखोरीच्या प्रकरणात अडकले आहेत.