पुणे: पाणीपुरवठ्यास मोठा दिलासा, खडकवासला धरणसाखळीत ७२.१२% पाणीसाठा जमा; टेमघरमध्ये सर्वाधिक पाऊस

पुणे: सतत सुरू असलेल्या पावसामुळे खडकवासला धरणसाखळीतील पाणीसाठ्यात लक्षणीय वाढ होत आहे. गुरुवारी (२३ जुलै) सकाळी ६ वाजेपर्यंत उपलब्ध आकडेवारीनुसार, खडकवासला, पानशेत, वरसगाव आणि टेमघर या चार धरणांमध्ये मिळून २१.०२ TMC म्हणजेच ७२.१२ टक्के पाणीसाठा नोंदविण्यात आला आहे.

गेल्या २४ तासांत चारही धरणांच्या पाणलोट क्षेत्रात चांगला पाऊस झाल्याने एकूण १,८९९ MCFT पाण्याची आवक झाली. मात्र, गेल्या वर्षी याच दिवशी धरणसाखळीत २३.३० TMC (७९.९४%) पाणीसाठा होता. त्यामुळे यंदाचा साठा अद्याप मागील वर्षाच्या तुलनेत कमी आहे.

खडकवासला धरण ८८.५२% भरले
खडकवासला धरण परिसरात २४ तासांत १३ मिमी पावसाची नोंद झाली. धरणात सध्या १.७५ TMC (८८.५२%) पाणीसाठा असून ४७१ MCFT पाण्याची आवक झाली आहे. खडकवासला धरणाच्या सांडव्यावरून आतापर्यंत १.५१ TMC पाण्याचा विसर्ग करण्यात आला आहे.

पानशेत आणि वरसगावमध्ये समाधानकारक वाढ
पानशेत धरण परिसरात ८४ मिमी पाऊस झाला असून धरणातील पाणीसाठा ८.१४ TMC (७६.४४%) इतका झाला आहे. येथे ५८० MCFT पाण्याची आवक नोंदविण्यात आली.
वरसगाव धरणात ६९ मिमी पाऊस झाला. धरणात ९.११ TMC (७१.०५%) पाणीसाठा असून ६३४ MCFT पाण्याची आवक झाली आहे.

टेमघरमध्ये सर्वाधिक पाऊस
चारही धरणांमध्ये टेमघर परिसरात सर्वाधिक १९७ मिमी पावसाची नोंद झाली. धरणातील पाणीसाठा २.०३ TMC (५४.६८%) असून २१४ MCFT पाण्याची आवक झाली आहे. जलसंपदा विभागाच्या आकडेवारीनुसार, पुढील काही दिवस पावसाचा जोर कायम राहिल्यास धरणसाखळीतील पाणीसाठ्यात आणखी वाढ होण्याची शक्यता आहे. त्यामुळे नदीकाठच्या नागरिकांनी प्रशासनाच्या सूचनांचे पालन करण्याचे आवाहन करण्यात आले आहे.

पावसाची नोंद (मि. मी.)
कुरवंडे १११, भोर ६३.५, तळेगाव २६.५, निमगिरी १७.५, चिंचवड १५.५, पाषाण ९.४, दापोडी ८.०, शिवाजीनगर ७.६, बारामती ७.०, एनडीए ६.५, राजगुरुनगर ६.०, डुडुळगाव ६.०, इंदापूर ५.०, कोरेगाव पार्क ४.५, हडपसर ४.०, शिरूर २.०, दौंड १.५, हवेली १.०, नारायणगाव ०.५.